Governu liuhosi Ministériu Justisa (MJ) ho World Vision asina akordu kona-ba rejistu labarik ho idade 0 ba tinan-lima iha munisípiu rua hanesan; Baukau no Aileu. Imajen mídia MJ

DILI, 4 Juñu 2019 (TATOLI) – Governu liuhosi Ministériu Justisa (MJ) ho World Vision asina akordu kona-ba rejistu labarik ho idade 0 ba tinan-lima iha munisípiu rua hanesan; Baukau no Aileu.

Ministru Justisa, Manuel Cárceres, agradese World Vision nia inisiativa hakarak apoia Governu atu rejistu sertidaun moris ba labarik sira.

“Lori Governu nia naran hakarak agradese ba World Vision tanba ho inisiativa rejistu labarik sira ne’ebé seidauk hetan sertidaun moris, nune’e hosi akordu ne’e sira bele hetan”, hatete Ministru Justisa bainhira asina akordu iha salaun enkontru Ministériu Justisa, Kaikoli, ohin.

Governante ne’e hatutan: “Hosi asinatura ne’e hanesan instrumentu ida atu bele halo kaman, todan ne’ebé ministériu justisa liuliu Diresaun Nasionál Rejistu Notariadu lori ba atribuisaun direitu sivíl ba sidadaun nian liuliu labarik sira nian”.

Ámbitu ne’e, Diretór Nasionál Rejistu Notariadu (DNRN), João Martins Borges, hateten objetivu akordu ne’e rejista labarik sira atu hetan sertidaun moris. Munisípiu Baukau iha suku lima, aldeia 34, munisípiu Aileu suku ualu, aldeia 51.

“Antes ne’e ami realiza uluk ona enkontru tékniku hodi rejistu labarik sira ho idade 0 iha munisípiu Baukau no Aileu. Tanba tuir relatóriu hosi estatístika hatudu labarik hamutuk porsentu 40 seidauk rejistu, atu hetan sertidaun nascimentu”, hateten  João Martins Borges.

João Martins Borges  espera esforsu ne’e, ba oin labarik sira moris mai bele rejistu kedas tuir artigu 7 konvensaun internasionál direitu labarik nian ne’ebé fó obrigasaun ba parte Estadu no inan-aman atu bele iha sensibiliza ba rejistu sira nia oan.

Diretór Nasionál Rejistu Notariadu (DNRN), João Martins Borges, ne’e haktuir orsamentu ba atividade ne’e $139.821.

Hosi totál ne’e hosi World Vision sei jere 69 mil, Ministériu Justisa, DNRN sei jere montante 70 mil. Orsamentu ne’e prevee ona iha akordu refere.

Ba munisípiu seluk, Diretór DNRN esplika rejistu liuhosi rejistu movel ne’ebé koopera ho UNICEF.

Maske iha akordu sei realiza uluk iha munisípiu rua, maibé tanba limitasaun rekursu maka sei realiza uluk iha munisípiu Baukau no remata maka kontinua ba Aileu.

Iha fatin hanesan, reprezentante WVTL, Evangelita Pereira, agradese ba serbisu hamutuk, tanba WVTL nia papél foka ba labarik.

Tan ne’e hosi akordu ne’ebé asina ona sai mós giaun ida hodi gia parte rua atu implementa akordu di’ak liu.

“Ami Agradese tebes ba serbisu hamutuk ne’e, hanesan pasu boot ida mós ba ami, hanesan organizasaun ida ne’ebé foka ba labarik entaun rejistu sivíl ne’e hanesan direitu labarik nian ne’ebé ami sempre halo parseria ho komunidade, liuhosi programa ne’e ita bele rezolve buat balu ba ita nia ki’ik oan sira”, hateten Evangelita Pereira.

Nia afirma, World Vision Timór-Leste hanesan Organizasaun internasionál ida, ninia ezisténsia kleur ona iha Timór-Leste hodi apoia Governu liuhosi setór oioin no ajuda Governu hodi implementa programa ne’ebé hatuur ona iha Planu Dezenvolvimentu Nasionál.

Akordu ne’e válidu hahú asina to’o fulan-juñu tinan 2020.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here