Ofisiais Polisia Nasional Timor Leste (PNTL). Imajen/António Gonçalves

DILI, 21 agostu 2019 (TATOLI)-Doadór sira husi Polisia Nova Zelándia  ho Organizasaun Naun Governmental (ONG) Internasionál, Fundasaun Ázia (TAF-sigla inglés) kontinua apoiu tékniku no finansiamentu ba Konsellu Polisiamentu Komunitáriu (KPK) to’o Dezembru 2020.

Notísia Relevante : Komandu PNTL Sei Fasilita Formasaun Ba Membru KPK

Kometimentu doadór sira ne’e hato’o  bainhira partisipa iha workshop  kona-ba “Modelu KPK” ne’ebé hala’o ohin iha Garden Beach, Dili. KPK nia misaun mak halo prevensaun konflitu iha bairru, suku no aldeia, inklui halo mediasaun ba konflitu sivíl sira iha suku laran iha territóriu nasionál.

Komandante Jerál Polisia Nasionál Timor-Leste (PNTL), Komisáriu Faustino da Costa, hateten, reprezenta instituisaun PNTL agradese ba apoiu tomak husi doadór rua ne’e  tanba  fó ona apoiu  ba instituisaun estadu ne’e  hodi implementa programa KPK.

“Fiar katak saida mak ohin ita diskute sei dezeña programa ida ne’ebé atu bele hadi’a di’ak liután KPK ba oin,” informa Komisáriu PNTL bainhira hala’o abertura ba workshop ne’e.

Notísia Relevante : PNTL Sei Koopera ho Autoridade Suku Kontrola Uma Koos iha Dili

Iha fatin hanesan, Xefe Departamentu Polisia Komunitáriu Nasionál, Superintendente Asistente, Antonio da Luz, esklarese, sorumutuk ne’e importante atu hetan opiniaun husi Komandante Munisípiu sira atu dezenvolve di’ak liután programa PPK ba futuru.

Maske doadór sira ninia  apoiu sei termina iha tinan oin, maibé  Xefe Departamentu ba Polisia Komunitáriu Nasionál ne’e  fiar doadór sira ne’e sei kontinua tau iha planu no programa annual hodi dezenvolve liután programa KPK.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here