Segundu Komandante PNTL Munisípiu Dili, Superintendente Asistente, Euclides Belo. Imajen/Eugénio Pereira

DILI, 13 agostu 2019 (TATOLI)-Komandu Polisia Nasionál Timor-Leste (PNTL) Munisípiu Dili sei halo koordenasaun ho autoridade suku, Munisípiu Dili nian, atu halo kontrolu makas ba uma koos privadu balun ne’ebé uza sai fali fatin prostituta.

PNTL Dili liuhosi Ofisial Polisia Suku (OPS), Konsellu Polisiamentu Suku (KPK) sei halo koordenasaun ho autoridade suku sira para  halo rejistu ba uma koos privadu iha kada suku ne’ebé fó aluga ba ema tenke rejista legál hodi garantia seguransa ba alin feto ka mane sira ne’ebé mai hosi foho halo estudu iha universitáriu ka servisu tenke hela iha fatin legál no seguru ba sira nia vida.

Komandu PNTL no autoridade Dili rasik preokupa no identifika uma koos balun iha Dili, ema uza sai fali fatin prostituta hodi hakiak atividade “borboleta kalan”.

“Uma koos balun iha Dili laran, ita deskonfia sai fali fatin ba atividade in-morál, tanba ne’e PNTL liu-liu OPS sei koordena ho estrutura KPK, xefe suku no estrutura suku atu halo rejistu ba uma koos sira ne’e,” dehan Segundu Komandante Polisia Nasionál Timor Leste (PNTL) Munisípiu Dili, Superintendente Asistente, Euclides Belo, ohin, ba jornalista iha Komandu Polisia, Caicoli, Dili.

Objetivu prinsipál hosi rejistu uma koos hodi regula no asegura seguransa di’ak liután ba bainaka ka ema ne’ebé aluga no uma na’in ne’ebé fó uma ba ema aluga bele kontrola nia fatin ho di’ak.

Komandu PNTL mós apela ba inan-aman sira iha foho ne’ebé haruka ona sira mai eskola iha Dili bainhira atu aluga uma koos tenke haree uma ne’ebé  legál no bele kontrola no garantia ba oan sira nia seguransa.

“Ita hakarak fatin koos sira ne’e identifikadu klaru para ita kontrola di’ak hodi evita problema oin-oin labele mosu fali iha fatin koos sira ne’e. Ami husu liu-liu inan feton sira atu kolabora ho autoridade suku, veteranu hodi ita kontrola katak, se de’it oin foun, feto mak mane maka mai tama hela iha bairru ida tenke rejistu no aprezenta aan ba autoridade lokál atu hatene,” hateten Euclides Belo.

Parte Polisia Dili sei koordena ho polisia 400 ne’e asegura seguransa iha Postu Administrativu neen (6) ne’ebé pertense ba Munisípiu Dili hanesan, Atauru ho suku lima (5), Kristu Rei ho suku hitu (7), Don Aleixo ho suku lima (5) Metinaro ho suku rua (2), Na’in Feto ho suku neen (6) no Vera Krús suku hitu (7) no Suku foun Madohi no Manleuana.

Euclides dehan, servisu ne’ebé PNTL no autoridade suku halo hodi buka minimiza mós problema seksu livre ne’ebé akontese iha Dili too ikus halo ema kontinua soe bebé  inosente iha sidade Dili.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here