Komandante Polisia Munisípiu Covalima, Superintendente, António Maria dos Santos. Imajen/Eugénio Pereira

COVALIMA, 19 agostu 2019 (TATOLI)-Komandu Polisia Nasionál Timor-Leste (PNTL) Munisípiu Covalima koordena ho FALINTIL-Forsa Defeza Timor-Leste (F-FDTL) garante selebrasaun festa konsulta populár iha Covalima la’o ho hakmatek.

Notísia Relevante : Covalima Konsidera Padre Nain Tolu Eroi Boot

Komandante Polisia Munisípiu Covalima, Superintendente, António Maria dos Santos, dehan, hahú kedas iha loron 1 agostu liu ba too agora situasaun iha area jurizdisaun Covalima la’o ho hakmatek no kontroladu.

Covalima lokalizadu iha zona osidentál husi kapitál Dili no fronteira ho Indonézia. Iha abitante 59.455 mil (Sensus 2010) no área ida ho 1.226 km². Covalima inklui Postu Fatululik, Fatumean, Fohorén, Mape-Zumulai, Maukatar, Suai no Tilomar, iha membru Ofisial Polisia Suku (OPS) no UPF koordena ho autoridade hametin nafatin seguransa.

Notísia Relevante : Komunidade Kovalima Kari Ai-funan iha Masakre Igreja Suai

“Ita kontente tanba ita nia povu sira selebra eventu festa konsulta populár ne’e la’o hakmatek loos husi Suai Vila too postu sira hotu koordenasaun polisia no autoridade la’o kapás tebes,” hateten Superintendente, António ba Ajénsia TATOLI, ohin, hafoin partisipa serimónia reflesaun konsulta populár iha salaun Parókia Igreja Covalima.

 António hato’o parabéns ba povu no joven sira halo reflesaun konsulta populár hodi rona mensajen husi veteranu no mate restu la’o kapás.

Komandu PNTL Covalima mós koloka ona nia membru sira halo operasaun konjuntu atu asegura nafatin labele mosu violénsia too festa konsulta populár remata.

Entretantu iha parte seluk, durante fulan Janeiru too mai agostu 2019, Komandu Covalima rejista kazu omisídiu tolu maka prosesa ona ba Tribunál Distritál  Suai.

Kazu sira ne’e maka hanesan, oho Administradór Postu Zumalai polisia kaptura ona suspeitu ida hodi hein prosesu. Kazu omisídiu balun tama ona ba prosesu iha Ministériu Públiku hodi hein mandadu kapturasaun no kazu la’en oho feen no polisia kaptura ona autór tama ona prizaun preventiva iha Covalima.

Kazu seluk tan maka polisia prende negosiante balun ne’ebé halo atividade fa’an sigarru illegal ne’ebé la uza  emblema (logo) RDTL no lori sigarru illegal tama mai husi fronteira Indonézia mai Covalima.

PNTL kontinua rezolve problema animál hanesan karau povu Indonézia halai tama mai área Timor-Leste no Timor-Leste tama ba área Indonézia rezolve tuir dalan kulturál.

“Kazu seluk tan maka ita rezolve problema animal ita nia tama ba parte Indonézia no Indonézia nia tama mai Timór ita rezolve tuir dalan kulturál,” tenik Komandante.

Kazu seluk tan maka PNTL prende ai-kameli ne’ebé populasaun sira tesi hodi fa’an ilegál ba Indonézia inklui kazu prende karreta no motór ne’ebé la iha dokumentu prosesa tuir lei.

Komandu PNTL detein mós membru grupu ilegál sira ne’ebé estadu taka ona halo krime no treinu subar hodi prosesa tuir lei ba tribunál.

Jornalista             : Eugénio Pereira

Editór                  : Francisco Simões

HAKEREK NO HATÁN

Please enter your comment!
Please enter your name here