Ministru Longuinhos dos Santos. Foto TATOLI: Egas Cristóvão

DILI, 19 agostu 2019 (TATOLI)-Orsamentu Jerál Estadu (OJE) 2019 ne’ebé aloka ba Ministériu Ensinu Superiór Siénsia no Kultura (MESSK) hamutuk $ 7,724 miloens. Orsamentu ne’e ezekuta tuir programa prioridade 10 ne’ebé konsagra ona.

Programa 10 ne’e, neen refere ba área ensinu superiór no siénsia nian hanesan infraestrutura, implementasaun polítika nasionál ensinu superiór, implementasaun kurríkulu mínimu, reforsa kondisaun funsionamentu IPB (Institutu Politéknika Betano), reforsa kondisaun funsionamentu INCT (Institutu Nasionál Siénsia no Teknolojia-sigla portugés) no mós jestaun no monitorizasaun bolsa estudu.

Enkuantu, haat destina ba área kultura nian hanesan estabelese akadémika arte no indústria kreativa kulturál. Estabelese biblioteka no múzeu nasionál.

Nune’e mós, promove atividade kulturál no promosaun no prezervasaun patrimóniu kulturál inklui promove atividade iha área biblioteka no muzeu sira.

Ministru Ensinu Superiór Siénsia no Kultura (MESSK), Longuinhos dos Santos hateten tinan kotuk 2018 orsamentu adisionál ba Ministériu ne’e hamutuk $ 7.7118 miloens kompara ho OJE 2019, MESSK hetan de’it $ 7,724 miloens. Signifika tinan ne’e orsamentu tun.

Tanba ne’e mak Dirijente husi Ministériu nian tenke koopera hamutuk ho planeamentu inklui Diresaun Jerál, Ministériu Finansas atu bele prepara adisionál ne’ebé aliña ho planu no programa prioridade 10 ne’ebé konsagra ona ba MESSK inklui Sekretáriu Estadu Arte Kultura (SEAK) nian.

“Ita-boot sira hatene katak programa prioridade 10 ne’e, programa 6 tutela ba MESSK no programa 4 aloka ba SEAK. Ne’e duni ita-boot sira atu halo adisionál tenke aliña ho programa prioridade 10 ne’e tanba programa sira ne’e mak aliña ona ho objetivu prinsipál Governu Sentrál nian,” tenik Ministru Longuinhos dos Santos perante diretór sira hotu iha salaun Sentru Koñesimentu, Eis-edifísiu Ministériu Finansa, segunda ne’e.

Ne’e duni, tuir ministru, presiza fó atensaun maka’as ba atividade adidu nian tanba durante ne’e orsamentu ba adidu la to’o. Orsamentu sira ne’e tama ona iha programa bolsa estudu nian nune’e mós orsamentu ba ensinu superiór universitáriu nian. Maske programa ne’e foun maibé presiza hetan atensaun maka’as.

Nune’e mós asesór sira ne’ebé tama ona iha kometimentu maibé to’o agora hasoru problema tanba asesór sira dala barak fulan rua mak foin simu saláriu. Problema seluk mós kona ba programa ezame sertifikasaun ne’ebé fulan setembru tinan ne’e tenke finaliza inklui kapitál dezenvolvimentu, formasaun ba profesór  sira.

“Ida ne’e mak sai kauza hodi afeta ba ezekusaun orsamentu ministériu nian. Ha’u mós foin update tan ita-nia ezekusaun foin mak atinje 41,3% agora ba oin ita bele ka lae. Tanba 15 outubru hakarak ka lakohi tenke atinje 75%. Ha’u husu ba ita-boot sira atu esforsa hodi nune’e bele atinje porsentu ne’ebé Primeiru-Ministru ezije daudaun”.

Agora OJE 2020, tuir Ministru Longuinhos dos Santos,  automatikamente sei tun tanba sasukat husi ministériu Finansas haree ba kapasidade ezekusaun orsamentu fraku ne’e mak afeta ba alokasaun orsamentu tinan fiskál tuir mai ne’e.

Notísia relevante:Ministru Longuinhos Sujere Diretór MESSK Sira Ezekuta OJE Ho Di’ak Liután

Jornalista :Tomé Amado

Editór        : Rafy Belo

HAKEREK NO HATÁN

Please enter your comment!
Please enter your name here