Ministru Ensiñu Superiór, Siénsia no Kultura, Longuinhos dos Santos. Imajen Tatoli/Egas Cristóvão

DILI, 19 agostu 2019 (TATOLI) – Ezekusaun Orsamentu Jerál Estadu (OJE) 2019 husi Ministériu Ensinu Superiór Siénsia no Kultura (MESSK) to’o agora foin mak atinje 41, 3%. Tan ne’e Ministru Longuinhos dos Santos sujere ninia diretór sira atu haree didi’ak ezekusaun ho di’ak liután atu bele atinje 75% molok outubru ramata.

“Ha’u hato’o ha’u-nia preokupasaun tomak ba ita boot sira kona -ba ezekusaun OJE MESSK nian. Tan ha’u hakarak dezafia ita-boot katak hakarak ou lakohi 15 outubru ezekusaun orsamentu MESSK nian tenke atinje ona 75%,”  hateten Ministru Longuinhos dos Santos ba diretór sira iha enkontru mensal MESSK nian iha salaun Sentru Koñesimentu, Fundu Dezenvolvimentu Kapitál Umanu (FDCH-sigla portugés), segunda (19/8/2019).

Governante ne’e haktuir, tanba bainhira enkontru ministeriál nian dala barak liu MESSK sempre simu krítika katak ninia ezekusaun la’o neineik liu.

“Agora daudaun iha ona agostu bele ka lae outubru ne’e ezekusaun bele atinje 75%. Ita hela de’it fulan ida ona tanba outubru ita la sura ona. Tanba ne’e hamutuk ho ita-boot sira atu esforsa maka’as hodi bele hetan rezultadu di’ak iha outubru agora”.

Nia friza mós katak loloos hanesan dirijente kompriende tebes kona-ba materiál saida mak atu uza iha ezekusaun ne’e atu nune’e labele hamosu komparasaun entre ezekusaun OJE 2018 no 2019 nian maibé tanba ezekusaun 2019 neneik liu.

Ministru Longuinhos fó hanoin hodi halo komparasaun katak 2018 estrutura MESSK nian seidauk kompletu maibé ninia ezekusaun la’o di’ak loos. “Tansá 2019 estrutura kompletu hotu ona mak mosu frakeza sira hanesan ne’e,” nia husu.

Ne’e duni, governante ne’e husu ba kada diretór sira atu aselera lalais ezekusaun ne’e ho planu ne’ebé iha hodi nune’e bele ajuda aprezentasaun relatóriu iha Parlamentu Nasionál.

Notísia relevante:Kritéria Aprezenta OJE 2020 Maka Haree Uluk Ezekusaun Orsamentál 2019 Nian

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here