Ministra Finansa en-ezersísiu, Sara Lobo Brites. Imajen Tatoli/Egas Cristóvão

DILI, 06 agostu 2019 (TATOLI)-Ministra Finansa ein funsaun, Sara Lobo Brites, hatete kritéria ida atu aprezenta Orsamentu Jerál Estadu (OJE) 2020 maka haree uluk ezekusaun OJE 2019 nian.

Tanba ne’e, ohin, Ministériu Finansa realiza diskusaun pakote fiskál 2020 iha salaun Ministériu Finansa (MF), iha ne’ebé ajenda dahuluk Primeiru-Ministru (PM), Taur Matan Ruak, orienta Ministra Finansa interina esplika progresu ezekusaun OJE 2019 ba membru Governu sira.

“Enkontru ne’e inisiativa mai hosi Primeiru-Ministru ba Ministériu Finansa tanba Konsellu Ministru partisipa de’it hosi ministru sira, entaun Sekretáriu Estadu no Vise-Ministru sira dalaruma la informadu programa ne’ebé maka Governu hakarak implementa iha orsamentu 2020, entaun liuhosi enkontru ohin bele halo diskusaun kle’an liu no mós halo revizaun uitoan ba ezekusaun OJE 2019”, Sara afirma.

Aléinde ne’e, Primeiru-Ministru orienta mós kona-ba planu prioridade ne’ebé sei implementa iha orsamentu 2020 nian.

Hafoin diskusaun, Sara Lobo Brites, informa ezekusaun OJE 2019 atinje ona porsentu 46.8, maibé iha kapitál menór no kapitál dezenvolvimentu maka porsentu sei ki’ik.

“Ezekusaun Orsamentu tinan 2019 atinje ona porsentu 46.8. Ha’u la lembra dadus klaru, más iha ezekusaun ne’e iha saláriu, bens e servisu no transferénsia públika atinje porsentu 50-resin, no ezekusaun ki’ik iha kapitál menór no kapitál dezenvolvimentu ha’u la lembra klaru ninia persentajen”, Sara dehan.

Kona-ba kualidade ezekusaun, governante ne’e dehan bainhira Tribunal de Contas hala’o ona ninia knaar, no Parlamentu Nasionál fiskaliza ona.

Relasiona ho ministériu balu ne’ebé seidauk iha ninia ministru, Sara Lobo salienta liuliu Ministériu Turizmu, Komérsiu no Indústria (MTKI) ninia ezekusaun ki’ik.

Tuir Portál Transparénsia ne’ebé TATOLI asesu, ohin, katak ezekusaun orsamentu ba MTKI atinje porsentu 32.4, husi orijen orsamentu $7,775,163.00, kompromisu $804,892.69, obrigasaun $688,805.57, atuál $1,830,483.05, no saldu $4,450,981.69.

“Maibé Ministru Turizmu no Komérsiu Interinu, Fidélis Manuel Leite Magalhães, dehan sei esforsu para rekupera filafali iha fulan hirak tuirmai”, Sara katak.

Notísia relevante : Primeiru-Ministru Orienta MF Esplika Progresu Ezekusaun OJE

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here