Foto/Google.

DILI, 19 agostu 2019 (TATOLI)-Diretór Jerál Finansa husi Ministériu Transporte no Komunikasaun (MTK), Deonísio de Araújo, hatete prosesu konkursu públiku ba produsaun blanku ba karta kondusaun no xapa matríkula orijinál ba motorista no kondutór sira konklui ona no iha kompañia rua maka manán iha prosesu ne’e.

“Iha ona kompañia rua maka husi komisaun aprovizionamentu ministériu publika ona iha jornál sira”, Deonísio afirma iha nia knaar fatin MTK Kaikoli, ohin.

Tanba ne’e, tuir lei aprovizionamentu ministériu nian tenke hein to’o semana ida bainhira laiha kontestasaun ruma husi kompañia seluk ne’ebé konkorre ba iha prosesu konkursu ne’e, entaun empreza rua ne’ebé sai manan-na’in ba iha konkursu ba produsaun blanku karta kondusaun no xapa matríkula orijinál sei hala’o iha tempu badak nian laran.

“Buat sira ne’e fiksu ona tuir ninia prosedura sira, ne’e tenke semana ida tuir lei nune’e kompañia bele halo servisu ona”, Deonísio dehan.

Diretór Jerál Finansa MTK ne’e rasik la lembra naran husi empreza rua ne’ebé maka manán konkursu ba iha produsaun blanku ba karta kondusaun no xapa matríkula orijinál.

Diretór Nasionál Transporte no Terrestre (DNTT) Ministériu Transporte no Komunikasaun, Natalino do Rosário, hatete DNTT iha tinan ne’e prevee osan $24.588 hodi hola blanku ba karta kondusaun orijinál no ba xapa matríkula tau rihun 22-resin.

Notísia relevante : DNTT Prevee $24.588 Hola Blanku ba Karta Kondusaun Orijinál

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here