Povu Covalima kari ai-funan no sunu lilin iha monumentu Masakre Suai, segunda (19/08/2019). Imajen/Eugénio Pereira

KOVALIMA, 19 agostu 2019 (TATOLI)-Komunidade ho autoridade, inklui família vítima masakre Igreja Suai, Munisípiu Kovalima, ohin halo reflesaun no kari ai-funan iha monumentu Masakre Igreja Suai.

Estudante sira Covalima ba kari ai-funan iha Munimentu Masakre Suai. Imajen/Eugénio Pereira

Serimónia ne’e nu’udar parte ida husi selebrasaun loron konsulta populár ba dala-20 (30 agostu 1999-30 agostu 2019) no prezensa Misaun Forsa  INTERFET, 20 setembru 1999.

Atividade ne’e partisipa husi Padre Sebastião Eugénio da Cruz Correia hodi hamulak no hasa’e orasaun, ne’ebé halibur mós estudante no joven sira husi Postu Administrativu hitu (7); Fatululik, Fatumean, Fohorén, Mape-Zumulai, Maukatar, Suai no Tilomar ho autoridade suku 30 ne’ebé reprezenta aldeia 138 iha Kovalima.

Iha reflesaun ne’e, reprezentante lider veteranu sira, organizasaun juventude rezisténsia sira hato’o istória kona-ba prosesu luta FALINTIL koordena ho povu inklui Igreja hodi luta ba ukun rasik aan iha Kovalima.

Iha loron 6 setembru 1999, Masakre planeadu boot ne’ebé akontese  hafoin konsulta populár mak Masakre  iha Igreja Nossa Señora do Rosario Suia (Igreja Suai), iha loron masakre ne’e konsidera hanesan asaun asasinatu planeadu hasoru  populasaun sivíl.

Masakre ne’e hatudu duni operasaun koordenada entre Militár Indonézia, hanesan KORAMIL, Salele, Kodim Suai (Militár Indonézia) no membru milisia Laksaur.

Iha tinan 20 liubá, Militár Indonézia no milisia Laksaur hahú asaltu no lansa asaun violénsia  ba Igreja Suai iha tuku 02:30 loro-kraik, sira soe granada no tiru arredór Igreja Suai nian antes tama ba Igreja Suai nia laran hodi halo atake ba populasaun sivíl  sira ne’ebé buka  protesaun  iha igreja laran.

Militár Indonézia ne’ebé komanda husi Olivio Mendonça  Moruk no Komandante Milisia MAHIDI lidera husi Câncio Lopes  de Carvalho  inklui militár Indonézia  ne’ebé lidera husi Komandante KODIM, Letkol  Litlek Koes Hadianto, Letnan Sugito, Komandante POLRI Suai, Letkol Gatot Subiakotora.

Sira oho populasaun hamutuk ema atus rua (200) inklui Padre Hilario Madeira, Padre Tarsisius Dewanto no Padre Francisco  Soares. Ema na’in tolu nolu (30) seluk Milísia no Militár no milísia sira oho hafoin ataka ba Igreja Suai.

Hafoin Konsulta Populár 30 agostu 1999, insidente violénsia mós akontese  iha fatin seluk hanesan asasinatu  ne’ebé akontese iha loron 12 setembru 1999, iha Suku Lectos, Fohorem-Kovalima, tanba populasaun Lactos  rejeita atu evakua ba Timór Osidentál no halai ba foho no ai-laran.

Komandante Militár Unidade Indonézia iha Lactos, Cosmós Amaral, ho nia membru na’in 20 hamutuk ho membru Milísia Laksaur buka tuir komunidade iha área Rai Ulun no obriga komunidade atu evakua ba Timór Osidentál, Militár Indonézia no Milisia Laksaur tiru hamutuk ema na’in 14, inklui ida sona ho tudik.

Vítima sira ne’ebé mate iha masakre ne’e maka hanesan, António Amaral, Bau, Alberto Ferreira, Ernesto Carvalho Letto, Anito Coli, Anito Mali, Anito Bau, Daniel Monis Anic, Domingos Amaral, Eurico Bau, Daniel  Taek, Abel Soares Gomes, José do Rego, Geraldo Amaral no Mane ida seluk ne’ebé sona ho tudik maka Boaventura de Araújo

Hafoin kari ai-funan, hahú ho serimónia kántiku Inu Nasionál Patria- Patria no inklui lee mensajen Prezidente Komisaun Organizadora Konsulta Populár,  Kay Rala Xanana Gusmão, husi Administradór Munisípiu Kovalima, Afonso Nogueira Nahak.

Poezia Furak Relembra Masakre Setembru Negro

Durante reflesaun, joven sira hananu mós múzika Kadalak Sulimutu ne’ebé konsidera nu’udar múzika rezisténsia hametin unidade nasionál Timoroan iha Luta.

Estudante Eskola Sekundária, Katólika Ave Maria Suai (ESCAM), Lurdes Luciana Cardoso lee poezia “Masakre Setembru Negro” no Reprezentante Joven “MOREDEPAZ” mós hato’o poezia ho tema “Via-Sakra Referendum no Rekonsiliasaun” no “Tinan 20 Maubere Nia Tanis” no poezia seluk tan.

Poezia furak rua ne’e, lee hodi fó relembra masakre setembru negro halo povu inklui partisipante balun tanis hanoin hikas violentu milisia iha tinan 20 liubá.

 Jornalsita            : Eugénio Pereira

Editór                   : Francisco Simões

HAKEREK NO HATÁN

Please enter your comment!
Please enter your name here