Madre Guilhermina Marçal FDCC hatudu hela hahán lokál ne’ebé sira tein hamutuk ho MAIKOM, iha Konventu Madre Canossiana, Balidi, Sábadu (17/9/2019). Foto/Antónia Maia Gusmão.

DILI, 17 agostu 2019 (TATOLI)-Primeiru-Ministru (PM), Taur Matan Ruak, louva vontade no inisiativa madre Canossiana ne’ebé lidera hosi madre Guilhermina Marçal FDCC  no Movimentu Asaun Ekonomia Komunitária (MAEKOM) ne’ebé lidera hosi emprezariu timoroan, Rui Castro, tanba valoriza ona produtu lokál.

Xefe Governu Daualuk ne’e sente onra boot tanba bele partisipa iha serimónia teste diversifikasaun produtu na’an-manu (frangu) ho fahi ba prosesamentu ai-han sourisu ho kompozisaun ingrediente lokál sira ne’ebé organiza hosi madre Canossiana ho MAEKOM.

“Ha’u hakarak fó parabéns ba MAEKOM ho madre sira, ha’u haree parseria di’ak ho MAEKOM tanba parseria ida ne’e iha produsaun hahán lokál no ha’u espera hametin no haboot liután iha futuru”, PM Taur dehan ohin, iha Konventu Canossiana, Balidi.

Kona-ba frangu ne’ebé haki’ak no prodús hosi MAEKOM, Xefe Governu ne’e dehan  merkadu iha no relasiona ho númeru ne’ebé MAEKOM prodús ona hamutuk millaun 1.2 ne’e bele absorve ona na’an-manu esportasaun.

“Ha’u hakarak dehan Governu fó apoiu tomak ba MAEKOM no sei esforsu hodi ajuda emprezáriu sira, nune’e bele kria investimentu ba produsaun tanba emprezáriu lokál kuaze porsentu 90 foku ba infraestrutura”, afirma Taur Matan Ruak.

Madre Guilhermina Marçal agradese ba prezensa Xefe Ezekutivu nian tanba ho prezensa ne’e bele motiva liután sira.

“Hafoin haree tiha atividade MAEKOM nian, Prezidente MAEKOM Rui Castro ko’alia ho ha’u kuaze tinan rua ona, no ohin ami realiza hamutuk projetu ida ne’e hodi haree ba nesesidade urjénsia ita-nia rain nian, invéz ita importa bebeik hahán hanesan ayam-potong. Tanba ne’e maka projetu ne’e importante ba hothotu no biban ne’e atu fó motivasaun ba povu Timor-Leste katak ita sai na’in ba ita-nia ra’in rasik, hatudu ita-nia espíritu nasionalizmu independente. Ita tenke hatudu mós nasionalidade hanesan agrikultór hodi bele fó han fali ita-nia maluk timoroan sira seluk”, dehan madre Guilhermina.

Papél MAEKOM hanesan movimentu asaun ekonomia komunitária, ema ne’ebé bele tama iha MAEKOM sira ne’e halo asaun ekonomia setór produtivu no la depende ba orsamentu subvensaun hosi Governu.

MAEKOM fó formasaun no orientasaun ba ninia membru sira atu prodús produtu ne’ebé merkadu sira presiza no folin regula hosi MAEKOM no folin labele boot liu produtu importa. MAEKOM ninia membru halo peskiza kona-ba diversifikasaun ba negósiu oioin depois loke dalan mitra ba komunidade ne’ebé iha interese ou vokasaun ba negósiu.

MAEKOM servisu hamutuk ho Ministériu Agrikultura no Peska (MAP), Ministériu Turizmu, Komérsiu no  Indústria (MTKI) no SEFOPE hodi prepara kondisaun no rede negósiu setór produtivu no indústria kriativa hodi hamosu “família ida negósiu ida, umakain ida, setór produtivu sai indústria família, indústria povu nian, indústria timoroan nian.

MAEKOM hakarak lori negósiu ba povu, no povu mak sai na’in ba nia negósiu rasik no hamosu suku ida produtu ida.

Notísia relevante : MAEKOM Iha Alvu Okupa Merkadu Nasionál Porsentu 40 Ho Broiler

Jornalista: Antónia Gusmão

Editor : Maria Auxiliadora 

HAKEREK NO HATÁN

Please enter your comment!
Please enter your name here