Ministru Agrikultura no Peskas Ministru Agrikultura no Peska (MAP), Joaquim José Gusmão dos Reis Martins, tesi fita iha manu Broiler nia luhan, iha Aldeia Rai Ku’ak, suku Lahane Osidental, Dili, Segunda (21/7/2019). Imagen TATOLI/Antónia Gusmão.

DILI, 22 jullu 2019 (TATOLI)-Diretór Movimentu Asaun Ekonomia Komunitária (MAEKOM), Rui Castro, iha atividade kolleita manu broiler hamutuk 1000 iha suku Lahane Osidentál hatete iha tinan oin, MAEKOM iha alvu atu okupa merkadu nasionál porsentu 40.

Nia dehan, agora MAEKOM hahú daudauk ho buat ne’ebé iha ho trajetu klaru katak iha dezembru tinan ne’e bele to’o ona rihun 200 (ba kolleita frangu) kada fulan no iha 2020 MAEKOM iha alvu atu okupa merkadu nasionál no nia dalan nakloke tanba vontade hakiak broiler barak loos, iha fatin-fatin no loron ba loron aumenta ba beibeik.

Kolleita manu broiler iha Lahane Osidentál.

Emprezáriu ne’e dehan, timoroan hotu hanoin setór produtivu tenke sai indústria povu nian, indústria família nian no timoroan nian. Tanba ne’e maka timoroan iha kapasidade bele halo lalais liu, tenke fiar katak ho ida ne’e de’it maka bele kompete.

Rui otimista katak bá oin hahú ho gerrilla negósiu tanba ho kapitál finanseiru ne’ebé timoroan limitadu, ho sidade negósiu ne’ebé okupa tiha ona hosi ema la’o rai, entaun MAEKOM koko atu sees hodi halo gerrilla negósiu no sei susesu iha ida ne’e.

“Ohin ha’u hakarak hatete katak ita susesu tanba norte, súl, ita okupa ho broiler maski iha fulan hitu nia laran. Espera katak produtu sira seluk sei suli hanesan bee no timoroan barak sei halai tuir no hakarak iha interese barak liu”, Rui afirma iha atividade kolleita broiler ba dalimak iha aldeia Rai Kuak, suku Lahane Osidentál, postu administrativu Vera Krús, munisípiu Dili.

“Tinan oin, timoroan hotu konsege servisu hamutuk trava de’it broiler porsentu 50 ne’ebé modelu hanesan la’o daudauk, dalan nakloke, ita bele trava mós produtu sira seluk. Bainhira ita la hamutuk atu konsege maka lalika mehi atu ba buat ida boot liu. Tanba ne’e mak MAEKOM sempre hahú ho moto katak hahú ki’ik neineik, beibeik maibé tenke ambisaun ba boot”, Rui promete.

Rui Castro dehan MAEKOM hakarak servisu hamutuk ho Ministériu Agrikultura no Peska, Ministériu Turizmu, Komérsiu no Indústria no SEPFOPE atu dezenvolve indústria sira ne’ebé iha setór produtivu hodi lori timoroan barak sai na’in ba negósiu.

Rui salienta iha ámbitu kolleita manu broiler ba dalimak ne’e, maski halo uluk ona iha fatin seluk, maibé ida agora ne’e espesiál tanba ne’e mai husi rezultadu investimentu joven timoroan hamutuk na’in-11 ne’ebé hamahan-aan iha MAEKOM, ne’ebé kompostu husi feto hitu no mane haat ne’ebé antes ne’e SEFOPE haruka bá serbisu iha Austrália liuhusi kooperasaun ho ajénsia internasionál CONEKTO no filafali mai ho vontade implementa sira-nia matenek hodi investe ho sira nian fundu rasik (ema ida tau osan 1000).

Iha atividade kolleita ne’e, partisipa husi Ministru Agrikultura no Peska (MAP), Joaquim José Gusmão dos Reis Martins, no Sekretáriu Estadu Formasaun Profisionál no Empregu (SEFOPE), Julião da Silva.

Ministru Joaquim José Gusmão hato’o parabéns ba joven na’in-11 ne’ebé ho inisiativa rasik investe iha setór produtivu, hodi implementa sira-nia matenek ne’ebé hetan durante iha Austrália.

“Iha polítika MAP nian katak hasa’e produsaun animál nian porsentu 20 to’o tinan 2023, tanba ne’e maka asaun ne’ebé MAEKOM halo kontribui maka’as ba númeru ne’ebé tuir survey hosi MAP ho UNTL halo. Ita-nia konsumu na’an per kapita kilograma 52, no na’an manu kilograma 9,9 kada tinan, ne’ebé ho esforsu tomak iha”, ministru Joaquim dehan.

Haree ba produsaun na’an manu maka’as, governante ne’e dehan ba oin sei taka uitoan torneira importasaun nian.

Jornalista : Antónia Gusmão  

Editora : Maria Auxiliadora

HAKEREK NO HATÁN

Please enter your comment!
Please enter your name here