Prezidente Konsellu no Jestór Rádiu Komunidade sira hasai foto hamutuk ho ekipa SEKOMS. Foto: Egas Cristovão.

DÍLI, (TATOLI)-Governu liuhusi Sekretáriu Estadu Komunikasaun Sosiál (SEKOMS) apoiu osan dolár rihun 61 ba estasaun rádiu komunidade 16 husi munisípiu 11 ho RAEOA (Rejiaun Autonoma Espesiál Oecusse-Ambeno) hodi fasilita sira-nia atividade sira.

Rádiu Komunidade sira ne’e mak hanesan Rádiu Komunidade Aileu Raihusar, Lian Maun-Fahe Same, Mauloko Maubisse, Iliwai Manatuto, Lian Matebian Baucau, Vox-Populi Lospalos, Sahe-Bucoli, Povu Vikeke, Lian Tatamailau Ainaro, Cova Taroman-Suai, Tokodede Liquiça, Café Ermera, Maliana, Atoni Lifau no Manu-Koko Ataúro.

“Ita iha estasaun 16, entaun ita apoia sira, totál 61 mil fahe ba estasaun 16 tuir proposta idaidak nian. Ohin sira asina, ida ne’e ba tinan ne’e. Ohin ha’u dehan tiha ona, tinan oin ita sei haree,” informa Sekretáriu Estadu Merício Juvinal dos Reis “Akara” ba jornalista sira hafoin entrega apoiu ba prezidente konsellu no jestór rádiu komunidade sira, iha otel JL. Vila, Fatuhada-Díli, ohin.

Sekretáriu Estadu Merício Juvinal dos Reis “Akara” Foto: Egas Cristovão.

Apoiu ida ne’e, tuir SEKOMS, Rádiu Komunidade sira seidauk bele garante sira-nia sustentabilidade hodi dinamiza sira-nia atividade lorloron hodi presta informasaun ba komunidade sira.

“Hanesan sira dehan, sira seidauk bele mesak maske espiritu rádiu komunidade ne’e loloos komunidade tenke mós fó apoia maka’as para notísia sira ne’e kontinua maibé realidade hatudu katak sei depende maka’as ba subsídiu governu no parseiru sira, entaun governu haree katak rádiu komunidade hanesan meius importante, liliu área rurál, entaun ita iha polítika atu kontinua apoiu sira to’o sira bele hamriik mesak,” dehan sekretáriu estadu Méricio Akara.

Sekretáriu estadu mós haktuir katak durante enkontru ho prezidente konsellu no jestór rádiu komunidade sira nia hateten ona katak rádiu komunidade sira tenke tuir transparante no tuir regra. Maibé, tenke esforsu aan atu halo serbisu di’ak liu para sira bele atinji metas sira ne’ebé mak termina.

“Tanba ida ne’e mak depois de ida ne’e, ekipa asesór, diretór sira sei aprezenta teknikamente oinsa sira iha akuntabilidade ba orsamentu, oinsa sira atinji metas ka objetivu ne’ebé mak iha,” katak sekretáriu estadu, Merício Akara.

“Dala ida tan, ha’u hakarak mak ne’e; jestaun tenke aberta,” insiste Sekretáriu Estadu Komunikasaun Sosiál, Merício Juvinal dos Reis “Akara” perante jornalista sira husi mídia oioin.

Iha biban ne’e, antes rádiu komunidade sira asina apoiu ho SEKOMS, sira hato’o idaidak nia preokupasaun no dezafiu sira ne’ebé mak rádiu sira ne’e hasoru. Dezafiu sira ne’ebé mak destaka liu iha enkontru ho SEKOMS ne’e mak maioria kona-ba, transporte, ekipamentu tékniku rádiu nian, kondisaun fatin serbisu nomós formasaun ba jornalista rádiu komunidade sira.

“Husu ba sekretáriu estadu atu haree to’ok oinsá? Karik, ita tau reporter atu halo serbisu ruma,  apakah tempu ida agora, ita uza mesik ketik? Tanba ida ne’e, karik bele, iha momentu ida ne’e, bele fasilita komputadór ruma?”, kestiona jestora Rádiu Tata Mailau, Ainaro, Rita Barros.

Nia hatutan: “Transporte iha ba reporter sira, maibé mina mak la iha atu tula ba halo kobertura. Segundu, buat hothotu ne’ebé ami uza, presiza ahi. Iha ne’ebá, ami uza ahi ne’ebé mak EDTL (Eletrisidade de Timor-Leste-red) monta, maibé kada fulan ami tenke ba selu”.

Entretantu, enkontru Konsellu Rádiu Komunidade husi Munisípiu 11 inklui RAEOA ho SEKOMS inklui parseiru sira hanesan UNICEF (United Nation International Children Fund), UNDP (United Nation Development Programme) no NAO nu’udar enkontru dahuluk.

Objetivu mak enkoraja partisipasaun komunidade hodi garante sustentabilidade estasaun rádiu nune’e bele minimiza depedénsia apoiu fundu husi governu.

Hatene besik funsionamentu rádiu komunidade iha idaidak nia atividade iha estasaun rádiu komunidade sira, introduz programa SEKOMS ba tinan lima nian hodi fortalese dezempeñu rádiu komunidade sira hodi habelar informasaun ba eduka komunidade sira no haforte kooperasaun parseiru sira hodi dezenvolve programa rádiu.

Rezultadu ne’ebé espera atu atinji mak eleva konsiénsia komunidade sira atu partisipa ativa iha programasaun no atividade rádiu nian hodi hamoris inisiativa no pró-ativu husi komunidade atu garante sustentabilidade iha futuru mai.

SEKOMS hetan informasaun  no koñesimentu profunda kona-ba partisipasaun komunidade iha rádiu komunidade sira nomós reforsa rede kooperasaun entre parseiru ho governu nian.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here