DILI, 14 agostu 2019 (TATOLI)—Foho-Lulik “Mundu Perdido”, ne’ebé kuda metin iha Ossu-Viqueque nia husar leten mós sai sasin ba funu naruk kontra okupasaun ilegál rezime Soeharto iha Timor-Leste.

Foho-Lulik “Mundu Perdido”, foho ibun-laek ne’ebé sai sasin no hasasin prosesu kontaktu dame, ne’ebé  ho objetivu ne’ebé aprezenta ba Governu Indonéziu, liuhusi Koronel Purwanto, mak negosiasoens ba solusaun pasífika, hodi rezolve problema Timor-Leste nian.

“Dalan ba negosiasoens ne’e komandu da luta propoen; (1) Envolvimentu nasoens unidas (ONU) nian, hodi buka halibur Portugal, nu’udar poténsia administrante, ho Indonézia nu’udar pótensia okupante; (2) Envolvimentu forsas polítikas hotu-hotu iha Timor-Leste, atu partisipa iha negosiasoens; (3) Referendu fó ba povu oportunidade atu fó sai ba mundu kona-ba sira-nia direitu; (4) Husu mós envolvimentu internasional iha prosesu ne’e,” haktuir Xanana Gusmão.

Ha’u Loke Sentru Formasaun Polítika Iha Edemumu

“Tanba laduun iha esperiénsia iha knaar polítiku, ha’u la’o tomak sub-rejiaun Viqueque Leste nian, husi suku ba suku, husi aldeia ba aldeia. Ho maluk sira, ha’u hili nu’udar ha’u-nia baze mak Matahoi. Iha ne’ebá mós ha’u loke kursu formasaun ba kuadru sira, hanaran CEFORPOL (Centro Formação Polítika) no ikus mai sentru ne’e muda ba besik Edemumu”.

Maluk sira hotu…

Iha loron hirak ne’e, ita sei hamutuk selebra loron boot ida iha ne’ebé, tinan ruanulu liu ba, povu tomak mak hamriik, deteminadu tebes atu ba tuu iha urnas, hodi hadau tiha ita-nia rain husi invazores no okupantes sira. Iha loron hirak ne’e, mak loloos ita hotu tenke halo reflesaun kona-ba funu naruk ne’ebé ita hasoru ho terus no susar barak tebes.

Funu tama iha ita nia Rain, iha loron 7 fulan dezembru tinan 1975.

Iha fulan Maiu tinan 1976, iha Soibada, Comite Central Fretilin (CCF) hala’o reuniaun hodi hasai estrutura polítiku-militár, hodi nune’e organiza luta. Reuniaun Soibada importante tebe-tebes tanba hatuur baze ba organizasaun populasaun iha baze de apoiu no organiza Falintil ba iha setór militár ida.

Husi reuniaun ne’e, ha’u hetan kolokasaun iha rejiaun Viqueque, hodi fó apoiu ba Sekretáriu Rejiaun Solan. Ha’u hahú serbisu daudauk iha Lakluta, bain-bain sekretáriu rejiaun depois de reuniaun komisariadu nian iha Lobito, aviza ha’u katak ha’u kolokadu fali iha parte Leste Rejiaun Viqueque, hodi toma konta Osú ho Viqueque, iha parte Lorosa’e no Uatulari ho Uatukarbau.

Tanba laduun iha esperiénsia iha knaar polítiku, ha’u la’o tomak sub-rejiaun Viqueque Leste nian, husi suku ba suku, husi aldeia ba aldeia. Ho maluk sira, ha’u hili nu’udar ha’u-nia baze mak Matahoi, iha ne’eba mós ha’u loke kursu formasaun ba kuadrus sira, hanaran CEFORPOL (Centro Formação Polítika) no ikus mai sentru ne’e muda ba besik Edemumu.

Iha tinan 1977, depois de reuniaun Comite Central Fretilin (CCF) iha Laline, mosu problemas iha nivél nasionál, hodi da’et mai to’o iha Ponta Leste, mosu problema remodelasaun iha organizasaun ba setóres, hodi setór Ponta Leste haluan to’o fali Estrada Baucau-Viquequq, hodi simu Zona Baguia, Laga, Kelikai, Uatukarbau, Uatulari no parte Leste husi Baucau, Venilale, Ossu no Viqueque.

Ho ida ne’e, ha’u hetan knaar atu tau matan ba parte Lorosa’e Baucau ho Viqueque nian. Iha ona 1978, ha’u transforma liu ba rejiaun Lautem nian.

Maibe, iha fukan Jullu nia rihan iha tinan 1977, inimigu  hahú halo operasoens boot, husi Fronteiras hodi sobu bazes  de apoiu .. to’o setór Sentru Leste, ne’ebé kaer husi parte loromonu Baucau, Viqueque to’o Rejiaun Manatuto tomak.

Setóres hotu-hotu naksobu tutuir malu, ho operasoens boot inimigu nian ne’ebé hanaran operaosens serklu no anikilamentu ba bazes de apoiu. Operasoens boot ne’e ezije ba populasaun no forsas hakiduk no halo movimentu maka’as hodi ema barak mate hamlaha moras no mós ho deskontrolu boot, ema barak lakon vida tamba inimigu oho. Situasaun difisil ne’e hotu mak halo populasaun tomak, iha nivel nasionál rende ka ema kaptura hotu.

Haree ba funu nia lala’ok hanesan ne’e, maka komisariadu setór Ponta Leste hala’o reuniaun no hasai desizaun atu, iha setór Ponta Leste, populasaun tomak sa’e ba Foho Matebian.

Marxa  ne’ebé poulasaun halo ba fóho Matebian, todan tebes, tamba lori sasan hotu ne’ebé nia iha, to’o animál kiik-oan sira mós sira lalin hotu. Esfórsu, kolen, terus sira hotu, lahalo populasauna hakiduk, hodi hatudu duni populasaun tomak nia determinasaun.

Inimigu hahu ataka Matebian iha fuan Novembru tinan 1978 ho morterius, kainoens, husi rai no husi tasi, ho tan bomba ne’ebé soe huusi avioens-kasa, populasaun hetan terus liután ho mate barak tebes!

Tamba tahan labele ona, Komisaun Politiku Sera key kontaktu husi rakal ho komandante da luta, iha sentru no komandu da luta deside atu; (1) Sobu tiha serku fóho Matebian no husik populasaun ba rende; (2) Kria iha Ponta Leste de Guerrilla ida no hili ha’u hanesan pesponsael ba reijaun autonoma ne’e; (3) Fórsas Falintil tomak ba hotu rejiaun sentral hodi hamutuk ho fórsas prinsipais ka brigada de xoke.

Nune’e mak iha loron ruanulu fulan novembru tinan 1978 sobu tiha serku hodi fórsas fahe malu ho populasaun.

Hahú iha tinan 1979, husi Ponta Leste, ha’u la’o buka tuir kuadru no forsa sira, hodi hetan Komandante Fera Lafaek ho komandante iha Uaibobo atu ba Makadiki, hodi hasoru malu ho komandante ho kuadru lubuk ida. Nune’e, mak hahú reorganiza forsas ba konsentra iha Ko’oleu, no ikus mai idak-idak ba fali ninia zonas.

Iha tinan 1980, Komandante Ko’o Sau, halo parte ho forsas balun iha destakamentu ligasaun nasionál hodi luta ba sentru no fronteira, buka tuir kuadru no forsa sira e’ebé namkari. Komandante Ko’o Sau ho forsas seluk ba buka tuir to’o iha fronteira sul, hodi hetan kuadrus no forsas balun tan.

Ho ne’e hotu, maka, depois de hetan kuadrus no forsas sira iha Fronteira, bele hala’i iha Laline, konferensia nasionál hodi reorganiza rezisténsia no Luta Armada, iha fulan Marsu tinan 1981. Iha ne’e mak kria Konsellu Nasionál da Rezisténsia Maubere (CNRM).

Maluk barak rona ona kona-ba kontaktu dame ka Sesar Fogu iha tinan 1983. Loos duni katak kontaktu ka hasoru malu ne’e, hala’o iha rejiaun sentral.

Maibé ha’u iha hela Laleno Ponta Leste, mak kuadrus sira ne’ebé serbisu hela iha klandestina fó hatene kona-ba intensaun inimigu nian, intensaun ne’ebé hato’o liuhusi Major Gatot, atu hasoru malu ho membru Comite Central Fretilin (CCF) sira seluk hodi bele hasai desizaun katak bele halo kontaktus ho inimigu no konkorda kona-ba frente armada nia objetivu ba kontaktu ne’e!

Objetivu ne’ebé aprezenta ba Governu Indonéziu, liuhusi Koronel Purwanto, mak negosiasoens ba solusaun pasifika, hodi rezolve problema Timor-Leste nian.

Dalan ba negosiasoens ne’e komandu da luta propoen; (1) Envolvimentu nasoens unidas (ONU) nian, hodi buka halibur Portugal, nu’udar pótensia administrante, ho Indonézia nu’udar pótensia okupante; (2) Envolvimentu fórsas polítikas hotu-hotu iha Timor-Leste, atu partisipa iha negosiasoens; (3) Referendu fó ba povu oportunidade atu fó sai ba mundu kona-ba sira-nia direitu; (4) Husu mós envolvimentu internasional iha prosesu ne’e.

CNRM (Conselho Nacional da Resistênsia Maubere) hala’o nia kanar to’o 1998, hodi muda ba CNRT (Conselho Nacional da Resistênsia Timorense).  Iha reuniaun iha Peniche, Portugal, halibur Fretilin, UDT no Partidu sira seluk.

Tinan 1983 to’o tinan 1999, povu Maubere hein kedan TINAN SANULU RESIN NEEN!

Ohin, ita hahú halo selebrasoens ba Konsulta Populár, hahú husi Munisípiu Lautem agora iha Viqueque!

Ha’u hakruuk ba rai-lulik no Matebian sira hotu, lahaluha ita-nia Eroi sira hotu, ne’ebé ha’u labele temi ida por ida no barak tebe-tebes ne’ebé maluk sira, imi labele haluha.

Hako’ak boot ba maluk sira tomak!

 Kay Rala Xanana Gusmão

Notísia relevante:Xanana Nia Lian “TATOLI” (III)

Jornalista: Cancio Ximenes

Editór      : Rafy Belo

HAKEREK NO HATÁN

Please enter your comment!
Please enter your name here