Ministru Longuinhos dos Santos. Foto TATOLI: Egas Cristóvão

DILI, 14 agostu 2019 (TATOLI)-Institutu Superiór Cristal (ISC) Polo Aileu to’o agora seidauk hetan legalidade husi Governu hodi fó lisensa atu hala’o ninia prosesu ensinu aprendizajen ba estudante sira. Tan ne’e Ministru Ensinu Superiór Siénsia no Kultura (MESSK) Longuinhos dos Santos husu ba ISC kumpre regra.

Instituisaun ida atu hala’o ninia ensinu aprendizajen uluk na’in tenke hetan lisensa tanba ne’e regra. Regra ne’e mak sei haforsa ho despaxu ministru nian atu nune’e bele hetan legalidade. Tan ne’e kualkér instituisaun saida de’it tenke hatene ninia prosesu satan instituisaun ensinu superiór ne’ebé atu eduka ema sai matenek presiza hatene ninia dalan.

“Ita demora hatán proposta ne’ebé Institutu Superiór Cristal hato’o tanba ita tenke halo uluk fiskalizasaun depois dokumentu sira tenke hetan avaliasaun tanba ne’e mak ninia prosesu ne’e demora inklui tenke hein lisensa operasionál tanba ne’e mak tenke hein duni,” dehan Ministru Ensinu Superiór Siénsia no Kultura (MESSK) ba jornalista Ajénsia TATOLI depois enkontru Konsellu Ministru, kuarta (14/08/2019).

Governante dehan, la fasil atu fó lisensa ba instituisaun ida atu ejerse ninia atividade tanba atu garante kualidade ba instituisaun ida governu tenke iha prosesu avaliasaun ida adekuada.

Nia bainhira nia hala’o fiskalizasaun iha ISC Polo Aileu kondisaun di’ak maibé falta barak no presiza atu kompleta atu nune’e bele lalais hetan resposta.

“Maibé ha’u ninia fiskalizasaun iha ISC Aileu ne’e ha’u ezije liu mak institutu tenke sentrál, tenke lalais halo kompleta fasilidade iha Fakuldade Saúde tanba ida ne’e importante tebes,” dehan tan ministru.

Ne’e duni, tuir ministru, kuandu fiskalizasaun ne’e mak ramata ona MESSK promete katak nia sei bolu hotu magnífiku reitór sira atu hetan rekomendasaun instituisaun balun bele taka.

Notísia relevante:Reitór ISC Husu Ba MESSK Hato’o Koñesementu Antes Hala’o Fiskalizasaun

Jornalista : Tomé Amado

Editór   : Rafy Belo

HAKEREK NO HATÁN

Please enter your comment!
Please enter your name here