Povu Ainaro selebra misa agradesimentu ba erio sira hodi komemora loron konsulta populár ba dala-20 (30 agostu 1999-30 agostu 2019) no Prezensa Forsa INTERFET, 20 setembru 1999. Imajen/Eugénio Pereira

AINARO, 14 agostu 2019 (TATOLI)- Autoridade no Komunidade Munisípiu Ainaro, ohin, ofisiálmente  selebra loron konsulta populár  (Referendu) ba dala-20 (30 agostu 1999-30 agostu 2019) ho prezensa forsa INTERFET, 20 setembru 1999, liuhosi misa agradesimentu hodi hasa’e orasaun ba eroi Timoroan no Ainaro oan tomak ne’ebé mate ba rai ne’e hahú hosi loron 7 dezembru 1975 too termina iha 1999.

Notísia Relevante : Pároku Ainaro Louva Estadu Rekoñese Habibie

Autoridade sivíl no militár Ainaro nian partisipa iha misa agradesimentu. Imajen/Eugénio Pereira

Misa agradesimentu ne’e partisipa direita husi autoridade suku, veteranu, autoridade sivíl no militár, estudante, inklui leigu uma kreda katóliku nian iha Igreja Parókia Nossa Señora de Fatima Ainaro.

Misa agradesimentu ne’e preside hosi Padre Pároku Armindo Brito, hahú iha oras 8:00 Otl, nu’udar momentu importante ho istóriku  hodi relembra hikas povu nia luta hamutuk ho eroi sira hodi termina Timor-Leste nia independénsia liuhosi referendu, 30 agostu 1999.

“Ita komemora loron konsulta populár ba dala-20, nu’udar istória importante ba joven sira atu hakaruk no respeita ba ita nia lider no eroi rihun atus resin tomak nia esforsu luta ba rai ne’e no ita hanoin nafatin sira atu fó nafatin espíritu ba ita hamutuk kontribui ba rai ne’e,” dehan Padre Armindo Brito iha  nia omilia.

Jerasaun otas foun sira paritispa misa agradesimentu ba eroi sira hodi komemora loron konsulta populár iha Ainaro. Imajen/Eugénio Pereira

Nia dehan, TL nu’udar nasaun joven too ona tempu atu hala’o ninia moris nu’udar joven ida forte, kriativu no inovadór ninia moris oinsá fó kontribuisaun ba susesu nasaun ohin ba futuru.

Padre dehan, selebrasaun tinan 20 sai esperansa no mehi boot ba Timoroan hotu-hotu oinsá hametin nafatin unidade nasionál no espíritu di’ak atu susesu ba ema idak-idak nia moris hodi fó susesu tutan ba nasaun nia destinu.

Ba juventude no estudante sira, Padre Armindo konta katak, funu ne’e Timoroan tomak manan ho grasa Aman Maromak nian hodi lori lider sira unidade ka’er metin povu no forma Frente Armada, Frente Klandestina no Frente Diplomatiku.

Nia mensiona mós katak, ukun aan ida ne’e la’ós oferta hosi bandeiza ida, maibé lori mate, terus no susar oin-oin maka manan. Tanba ne’e husu ba Timoroan sira halo reflesaun hodi fó nafatin omenajen ba Timoroan rihun ne’ebé mate ba rai ne’e bele fó matak no dame ba Timoroan sira ho grasa Maromak.

Igreja Katólika mós  husu atu lider polítiku sira kontinua fó liman ba malu hodi lori nasaun ba moris iha dame no dezenvolvimentu prósperu.

Hosi sorin seluk, Veteranu Rezisténsia Ainaro, Fernando Xavier dehan, husu ba joven sira atu sai joven no estudante sira tenke badinas estuda no  matenek hodi kontribui ba dezenvolvimentu nasionál.

“Ami veteranu sira uluk sabraut, maibé ho sabraut ami trasa planu manan nasaun ida. Ohin, ami lakohi imi atu sai sabraut tuir ami, maibé ami husu ba imi estuda makas, aprende buat di’ak para lori nasaun troka ami katuas sira,” hateten Fernando Xavier.

Administradór Munisípiu Ainaro, Albertino de Araújo dehan, misa agradesimentu ne’e importante hodi fó hanoin hikas istória moruk sai referénsia hodi halo nafatin buat di’ak.

Ba joven sira,  Administradór husu atu respeita nasaun no hadomi malu hodi lori dame ba Ainaro oan hotu.

Albertino dehan, agora too ona tempu atu Timoroan sira lolo liman kumu metin hodi hatudu ba mundu seluk fó nafatin apresiasaun ba TL nia independénsia.

Tuir nia, mezmu Ainaro sei hasoru hela dezafiu menus rekursu umanu no seidauk iha orsamentu rasik atu dezenvolve munisípiu ne’e, maibé nafatin koopera governu sentrál atu hadi’a dezenvolvimentu infraestrutura, estrada, edukasaun, bee moos, eletrisidade no saúde too ba povu iha área rurál.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here