Eis Prezidente Repúblika Indonézia, B.J. Habibie. Imajen foti husi google

AINARO, 14 agostu 2019 (TATOLI)-Padre Parókia Nossa Señora de Fatima  Ainaro, Armindo Brito, louva ho desizaun Estadu nian ne’ebé fó rekoñesimentu ba kontribuisaun eis Prezidente Repúblika Indonéziu, B.J. Habibie nian hodi fó opsaun rua (CNRT ho Autonomia)  ba povu Timor-Leste atu bele hili liuhosi konsulta popular (Referendu), 30 agostu 1999.

Notísia Relevante : Habibie Hato’o Apresiasaun Boot ba Povu Timor

Padre Armindo Brito dehan, nu’udar Timoroan nia hakaruk no agradese haree esforsu no korajen  Komandante ein-Xefe FALINTIL, Kay Rala Xanana Gusmão, hodi buka rekoñese lider nasaun seluk nia kontribuisaun ba Timor-Leste nia independénsia.

Padre Parókia Nossa Señora de Fatima Ainaro, Armindo Brito. Imajen/Eugénio Pereira

“Ita nia ponte Bidau agora tau naran Eis Prezidente B.J. Babibie, ita agradese, balun protesta.…..huuusssss….! Lalika protesta!, Se nia (Habibie) mak la fó opsaun ba ita agora atu sai saida? No ukun aan ne’e mai bainhira loos?. Ita agradese tanba nia fó opsaun too militár ba ameasa nia, atu oho nia, too nia mós lakon buat hotu-hotu. Nu’udar sidadaun ita haree hetan esforsu hotu-hotu ne’ebé Maun Boot Xanana halo di’ak hatudu ninia personalidade hatene hakuak no valoriza ema hotu-hotu nia kontribuisaun,”  afirma Padre Armindo Brito liuhosi nia omilia iha  misa agradesimentu selebrasaun loron konsulta populár iha Munisípiu Ainaro, ohin, iha Igreja Ainaro.

Notísia Relevante : Ponte Bidau Tau Naran Habibie Tanba Kontribuisaun

Amu agradese, Xanana Gusmão lori Timor-Leste hametin fila fali rekonsiliasaun ho nasaun Indonézia sai ezemplu ba mundu seluk atu ba nati tuir ezemplu dame rai rua nian.

“Ita nia lider sira funu, depois funu hotu sira hasoru malu sira iha korajen perdua malu.  Jesus mós nune’e, iha korajen atu perdua, hakuak malu hatudu dame no ezemplu di’ak ba ita jerasaun foun sira ida agora ne’e, atu aprende fó perdua ba malu, hakuak malu ho domin  no matan been,” tenik Amu Armindo Brito.

Nia dehan, Maromak halo ema moris mai la’ós kontente de’it, maibé sofre mós iha moris no terus hotu-hotu tanba de’it hakarak moris di’ak la iha tan terus no sofrimentu oin-oin.

“Igreja mós sofre bainhira hamutuk ho povu, padre sira terus no susar hamutuk iha mate nia laran ho povu, tanba ita hotu- hotu hakarak ukun aan,” afirma Amu Pároku ne’e.

Ba Nai Lulik no povu sira ne’ebé mate, Padre Armindo Brito dehan, sira nia klamar sei tama ba Lalehan no sira nia isin sei sai rai rahun hodi fó lembra ba timoroan ne’ebé sei moris kontinua konta nafatin istória hodi hadi’a rai ne’e.

Amu hatutan, independénsia TL hetan ona, agora fó perdua ba ema ne’ebé halo buat la di’ak, atu nune’e rai Timór bele manan iha moris hotu- hotu.

“Ita buka atu fó perdua ba malu, hanesan Jesus fó perdua ba buat hotu- hotu mezmu ema halo aat ba nia, Na’i Jesus fó perdua-perdua nafatin atu manan buat di’ak,”.

Padre Armindo dehan, ezemplu seluk tan mak, lider rezisténsia, Taur Matan Ruak, Lere Anan Timur uluk ho veteranu sira seluk funu tinan 24 hasoru militár no jenerál boot sira hosi Indonézia hanesan, Wiranto, Prabowo no Susilo Bambang Yudhoyono, agora sai lider ezemplar funu tinan naruk, dame ho tempu lalais.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here