Membru Konsellu Estadu, Naimori Bucar akompaña hosi Administradór Munisípiu Ainaro, Albertino de Araújo no Diretór Edukasaun Munisípiu Ainaro, Celestino Magno no autoridade sira lansa programa kompetisaun sertame iha Ainaro Vila, kuarta (14/08/2019). Imajen/Eugénio Pereira

AINARO, 14 agostu 2019 (TATOLI)- Autoridade Munisípiu Ainaro koordena ho Ministériu Edukasaun Ainaro no Ministériu Administrasaun Estatál (MAE) realiza kompetisaun sertame entre estudante sira ho formasaun pergunta liga ba istória jerál Timor-Leste durante prosesu funu 1975 too 1999.

Notísia Relevante : Povu Ainaro Selebra Loron Referendu ho Misa Agradesimentu ba Eroi Sira

Konkorrente sira ne’ebé hola parte iha sertame ne’e mai hosi Estudante Eskola lima (5) iha Ainaro hanesan, Eskola Sekundariu Jerál (ESG-sigla portugés) Fernando La Sama de Araújo, ESGC Santa Maria Ainaro, ESGC Santo Inácio Loiola Maubisse, ESGC Nain Feto Ramelau Hatobuilico no ESGC Nossa Señora de Lourdes Hatoudo.

Diretór Edukasaun Munisipiu Ainaro, Celestino Magno dehan, eventu ne’e importante hodi kadi foin sa’e estudante Ainaro oan sira nia matenek iha área istória Timor-Leste.

Nia dehan, husi eskola lima ne’e, bainhira ida manan sei reprezenta Ainaro ba tuir kompetisaun sertame iha nasionál.

Nia husu karik iha kompetisaun estudante sira ne’ebé valór la too labele lakon esperansa, maibé kontinua estuda atu sai matenek hodi too tempu ruma sai lider ba Ainaro.

Iha fatin hanesan, Administradór Munisipiu Ainaro, Albertino de Araújo, apresia ho kompetisaun ne’e, no husu estudante sira atu kompete ho matenek bele manan.

 “Husu ba estudante sira atu estuda ho didi’ak para too tempu ruma imi mai troka fali ami lidera rai ne’e,” hateten Albertino de Araújo.

Realiza Atividade Oioin

Administradór Ainaro, Albertino de Araújo dehan, selebrasaun konsulta populár ne’e Ainaro realiza atividade oioin hanesan, kompetisaun sertame, jogu futeból postu administrative haat, Ainaro Vila, Hatubuilico, Hatoudo, no Maubisse.

Kompetisaun seluk tan maka,  halai maratona kilómetru 10 hosi Suku Nunumoge ba Ainaro Vila, halai karon, sa’e bua, nata berlindu, dada tali no taka ho atividade konsertu múzika  hosi Banda Lahane Group.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here