Kondisaun atmosérika ba lorokraik, tersa (13/08/2019). Anin sei nafatin huu makas too lokraik. #DNMG

DILI, 13 agostu 2019 (TATOLI)-Anin boot ne’ebé akontese iha semana rua kotuk iha territóriu nasionál rezulta uma 30 mak hetan estragus.

Notisía Relevante : Alerta Hosi DNMG, Sei Akontese Anin Boot iha TL

Uma sira ne’e iha Munisípiu Manatuto, Bobonaro ho mós iha Dili. Kazu hanesan akontese mós ba uma rua iha Suku Hera Postu Administrativu Kristu Rei, Munisípiu Dili, segunda (10/08/2019).

Diretór Jerál hosi Sekretáriu Estadu Protesaun Sivíl, Superintendente Asistente Polisia Nasionál Timor-Leste (PNTL), Ismael da Costa Babo, hateten, iha segunda lorokraik (12/08/2019), anin boot sobu mós uma ida iha Becora.

“Dadus provizóriu hatudu katak, iha uma 30 mak hetan estragus durante semana rua ikus kauza hosi anin boot,” konfirma  Ismael da Costa  Babo, hodi responde TATOLI  iha  ninia servisu fatin, Caicoli, Dili.

Ismael Babo hateten, anin sobu mós uma komunidade ida iha Suku Lahomea,  Postu Administrativu Maliana, Munisipiu Bobonaro.

Tuir relatóriu verifikasaun provizóriu hosi total uma kain 30   ne’e fahe ba kategoria tolu  hanesan  estragus todan, natoon no kaman, maibé la rezulta mate no kanek.

Nia realsa daudaun ne’e pontu fokál hosi Sekretáriu Estadu Protesaun Sivíl iha  Munisípiu idak-idak koordena ona ho autoridade lokál hodi distribui ona apoiu emerjénsia  hanesan foos, mina, hena, sabaun, susu been, sanan, bikan, tasu no seluk tan  ba vítima sira.

Ba vítima dezastre naturaís iha Suku Lahomea, Postu Administrativu Maliana Munisípiu Bobonaro, Ismail hateten,  seidauk hetan apoiu emerjénsia tanba estoke sasán iha armazén Munisípiu laiha.

Atu garante estoke apoiu iha armazén iha munisípiu ida-idak, Diretór Jerál hosi Sekretáriu Estadu Protesaun Sivíl, Ismael da Costa Babo,  fó ona orientasaun ba Diretór Diresaun Dezastre naturaís sira atu aselera prosesu aprovizionamentu hodi sosa ekipamentu hirak ne’e.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here