Ekipa Diresaun Nasionál Meteorolojia Jeofízika (DNMG) fó sai mapa posibilidade sei akontese anin ho velosidade makas derrepente entre loron 10 too 12 fulan Agostu 2019. Imajen/DNMG

DILI, 08 agostu (TATOLI)-Ministériu Transporte no Komunikasaun (MTK) liuhosi Diresaun Nasionál Meteorolojia Jeofízika (DNMG-sigla portugés) alerta ba populasaun iha territóriu nasionál atu toma atensaun ba anin ho velosidade makas ne’ebé sei akontese derrepente entre loron 10 too loron 12 fulan agostu 2019.

Avizu no alerta ne’ebé fó sai hosi Diresaun Nasionál Meteorolojia Jeofízika ne’ebé Ajénsia TATOLI asesu, ohin, katak, anin makas sei akontese iha kada munisípiu ne’ebé diferente, no husu atu povu sira kuidadu hodi evita aan hodi labele hetan asidente ruma.

Tuir mai, públiku bele asiste direita velosidade anin makas ne’ebé ekipa DNMG fó sai ne’ebé sei akontese iha kada munisípiu.

Dili- Rajadas hosi anin sei varia entre 40-50 km/h.

Baucau- Rajadas hosi anin sei varia entre 30-40 km/h

Lautem- Rajadas hosi anin sei varia entre 40-50 km/h.

Liquisa- Rajadas hosi anin sei varia entre 45-55 km/h.

Viqueque – Rajadas hosi anin sei varia entre 40-50 km/h.

Manatuto- Rajadas hosi anin sei varia entre 50-60 km/h.

Ainaro – Rajadas hosi anin sei varia entre 60-70 km/h.

Aileu – Rajadas hosi anin sei varia entre 50-60 km/h.

Suai – Rajadas hosi anin sei varia entre 40-50 km/h.

Ermera – Rajadas hosi anin sei varia entre 20-30 km/h.

Raeoa – Rajadas hosi anin sei varia entre 40-50 km/h.

Maliana – Rajadas hosi anin sei varia entre 55-65 km/h.

Same – Rajadas hosi anin sei varia entre 35-45 km/h.

Atauru – Rajadas hosi anin sei varia entre 60-70 km/h.

Relasiona ho previzaun mensiona iha leten nota katan rajada hosi anin ne’e rasik sei makaas iha área sira hanesan Manatuto, Ainaro, Aileu, Maliana no mós Atauru. Tanba ne’e,  DNMG husu komunidade sira ne’ebé atu halo viajen ka hela iha área ne’ebé mensiona ona atu kuidadu nafatin ba iha loron sábadu, domingu to’o segunda.

DNMG husu atensaun ba povu atu kuidadu, tanba ida ne’e previstu atu akontese tanba hetan influensia hosi pozisaun sistema alta presaun ne’ebé lokaliza iha setór Sudueste hosi Austrália nune’e influensia padraun anin husi Monsaun Asia-Austrália.

Ekipa DNMG akresenta mós katak, eventu ida ne’e mosu tanba iha diferensa presaun entre rejiaun Austrália no Asia.  Alende ida ne’e, iha previzaun katak valór presaun iha Austrália sei varia entre 1030 too 1032 hPa no rejiaun Asia nia valór presaun sei varia entre 1012 too 1018 hPa.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here