DILI, 13 agostu 2019 (TATOLI)- Pesoál Tékniku hosi Ajénsia Dezenvolvimentu Nasionál (ADN), Francisco Xavier, informa, ekipa tékniku ba preparasaun fatin hodi komemora tinan 20 konsulta populár (30 Agostu 1999- 30 Agostu 2019) no prezensa misaun INTERFET, 20 Setembru 1999, iha Tasi-Tolu to’o ohin atinje ona porsentu 55.
Notísia Relevante : Preparasaun Fatin Serimónia Konsulta Popular Porsentu 25
Daudaun ne’e ekipa tékniku hosi ADN no kampaña Bhakti Timor Karya (BTK) harii ona ai-riin atu monta tenda hamutuk tolu (3) hodi prepara ba bainaka importante (VIP-sigla inglés), membru Governu, Membru Parlamentu Nasionál, Tribunal, Prezidente Autoridade Munisípiu, Postu Administrativu, Xefe Suku to’o Aldeia.
“Tuir ADN nia alvu katak to’o loron 22 agostu, bele finaliza ona maibé ami sei haree mós ba buat ki’ik sira ne’ebé mak sai hosi lista ne’ebé ita hakarak aumenta, entaun iha loron 22 to’o loron 24 agostu, tinan ne’e, sei servisu ne’ebé mak ligadu ho adisionál,” informa tékniku ADN, Francisco Xavier, ba TATOLI, ohin, iha Tasi-tolu, Dili.
Alende tenda, hosi parte Ajénsia Dezenvolvimentu Nasionál mós sei harii sanitária provizóriu ba bainaka importante sira, maibé la sita sanitáriu hira maka ADN sei harii ba ema importante sira durante komemorasaun ne’e.
Jornalista : Osória A. Marques
Editór : Francisco Simões
