Trabailadores sira halao hela reabilitasaun ba uma tradisionál (uma adat) iha Tasi Tolu, nu'udar fatin ba selebrasaun festa konsulta populár ba dala-20 (30 agostu 1999-30 agostu 2019). Imajen/Florencio Ximenes

DILI, 02 agostu 2019 (TATOLI)-Ministériu Planu Estratéjiku no Dezenvolvimentu Nasionál (MPIE) atribui hela kompeténsia ba Suku Comoro atu mobiliza no halo preparasaun ba fatin serimónia festa konsulta populár ba dala-20 (30 agostu 1999-30 agostu 2019) iha Tasi Tolu, Dili.

Xefe Aldeia 12 Outubro, Suku Comoro, Plácido Marçal. Imajen/Osória A. Marques

Fizikamente preparasaun ne’ebé hahú hosi  loron 25 jullu to’o ohin loron, sesta (02/08/2019), atinje ona porsentu 25.

Xefe Aldeia 12 Outubro, Suku Comoro, Plácido Marçal, informa, preparasaun foin atinje persentajen ne’e tanba tenke han tempu iha reabilitasaun ba uma tradisionál (uma adat) ne’ebé mak durante ne’e abandonadu no juventude sira aproveita hodi pinta estraga nia riin no nia moru lolon.

Trabailadores sira halao hela reabilitasaun ba uma tradisionál (uma adat) iha Tasi Tolu, Sesta (02/08/2019). Imajen/Osória A. Marques

“Ita seidauk bele avansa ba oin, maibé parte tenda, instalasaun ba eletrisidade ne’e hotu ona no hariis fatin rua ba VIP mós atu prontu daudauk ona,” informa Xefe Aldeia, 12 de Outubru, Plácido Marçal, ohin, ba jornalista Ajénsia TATOLI, iha Tasi Tolu, Dili.

Ba tenda lubun ne’ebé harii ona, Xefe Aldeia ne’e hateten, hein de’it ona to’o loron 28 agostu mak monta lona ba leten.

Jornalista : Osória A. Marques

Editór       : Francisco Simões

HAKEREK NO HATÁN

Please enter your comment!
Please enter your name here