Atividade kuda ai-oan parte ida hodi proteze ambiente hosi dezastre naturais. Imajen/TATOLI

DILI, 13 agostu 2019 (TATOLI)-Diretór Jerál Protesaun Sivíl, Superintendente Asistente Polísia Nasionál Timor-Leste (PNTL),   Ismael da Costa Babo, apela ba komunidade hotu iha territóriu atu evita sunu rai arbiru ba prevensaun dezastre naturaís.

Notísia Relevante : Dezastre Naturaís Rezulta Na’in Haat Mate no Sobu Uma 106

Ismael da Costa Babo hato’o mensajen ne’e relasiona ho alerta ne’ebé fó sai hosi Diresaun Nasionál Meteorolojia no Jeofízika foin lalais ne’e katak sei akontese anin boot durante agostu 2019.

“Anin boot lori lalais ahi ba fatin ne’ebé de’it, entaun husu komunidade hotu atu halo prevensaun ida ne’e,” Ismail Babo hateten ba ajénsia TATOLI iha ninia servisu fatin, ohin, iha Caicoli, Dili.

Notísia Relevante : Dezastre Naturál Rezulta Uma 72 Hetan Estragu

Ba sidadaun ne’ebé fuma sigarru  tenke hamate ahi iha sigarru rohan depois fuma hodi nune’e bele prevene ahi han rai ka inséndiu iha tempu bai loron naruk.

Nia mós husu ba komunidade sira ne’ebé nia uma iha kondisaun la seguru atu evakua ba fatin seluk bainhira akontese anin boot.

“Husu ba populasaun atu konserva nafatin bee ho fasilidade ne’ebé estadu kria iha tanke ne’ebé iha,” Ismail Babo hateten hodi lia tun tan dehan, servisu Bombeiru prontu atu fó sokorru ba sidadaun sira bainhira mosu ahi han rai ka inséndiu iha kualkér oras.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here