Udan no anin boot ne’ebé akontese iha kosta súl, rezulta estrada no ponte ki’ik iha área Beaço-Viqueque, kotu afeta ba movimentu transporte públiku. Imajen/TLMeteoClima

DILI, 15 maiu 2019 (TATOLI)—Populasaun nia uma hamutuk 72 maka hetan estragu durante destre anin no udan boot ne’ebé akontese iha domingu (05/05) to’o domingu (12/05) iha parte leste no kosta súl.

Diretór Jerál Servisu Operesionál no Protesaun Sivíl (DJ-SOPS), Superintendente Asistente Polísia, Ismael da Costa Babo ba Agência Tatoli iha nia servisu fatin, Ministériu Interiór Vila Verde, kuarta (15/05), dehan durante akontesimentu dezastre naturál, ekipa Bombeiru, Siguransa Sivíl, Polísia Nasionál Timor-Leste (PNTL), Cruz Vermella Timor-Leste (CVTL-sigla portugés) no autoridade lokál sira to’o kedas iha fatin akontesimentu hotu-hotu hodi ajuda vítima sira no rekolla kedas dadus.

Tuir dadus ne’ebé ekipa Diresaun Nasionál Jestaun Risku Dezastre (DNJRK) rekolla iha Munisípiu Baucau, identifika família afetadu hamutuk 20 kompostu iha suku Abo (Quelicai) uma ida (1) ahi han, suku Tirilolo (Baucau Vila) uma rua (2), suku Bahu uma ida (1), suku Uacala (Postu Administrativu Baguia) uma 10 no suku Samalari uma haat (4).

Iha Munisípiu Covalima, indentifika família afetadu lima (5) kompostu suku Dato Rua (Suai Vila) uma ida (1) ahi han no suku Suai Loro uma haat (4) hetan estragu.

Iha Munisípiu Lautém, iha suku Fuiloro anin boot estraga uma hamutuk 12 no rezulta labarik ida (1) mate tanba inundasaun maka’as halo bee tama uma no bee sobu estrada inklui ai-hún boot balun tohar.

Aleinde ida ne’e, iha Munisípiu Manatuto, Postu Administrativu Natarbora, suku Nunboku udan no anin iha loron domingu (12/05) halo mota tún maka’as lori ema ida (mate). Família no ekipa buka hetan ona mate isin.

Iha Munisípiu Manufahi, Postu Administrativu Alas, Same Vila, no Fatuberliu identifika família afetadu hamutuk 37.

Nune’e mós iha Munisípiu Viqueque, identifika família afetadu hamutuk 10 kompostu Viqueque Vila na’in 1, suku Bibileo ida (1) no iha Postu Administrativu Uatulari, suku Vessoru/Galele na’in ida no rezulta vítima ida ho kondisaun difisiente mate tanba ai-hún boot tohar hanehan uma.

Kona-ba populasaun sira nia uma ne’ebé hetan estragu totál, Diretór Ismail dehan, Ministériu Solidaridade Sosiál no Inkluzasaun (MSSI) sei halo fila fali identifikasaun hodi fó apoiu materiál kontrusaun ba vítima sira hodi harii fila fali uma.

Ismail hatutan, udan ne’e rezulta mós ponte Lamara, Postu Administrativu Natarbora, Munisípiu Manatuto no Ponte Dilór, Munisípiu Viqueque, kotu hodi afeta ba movimentu transporte públiku.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here