Estudante selesionadu sira tuir formasuan protokolu iha MNEK ba festa referendu, 30 agostu 2019. Imajen/ Nelson de Sousa

DILI, 12 agostu 2019 (TATOLI)-Estudante selesionadu na’in 116 ho funsionáriu liña ministeriais na’in 17, ohin, ofisiálmente tuir formasaun protokolár iha Ministériu Negósiu Estranjeiru no Kooperasaun (MNEK).

Notísia Relevante : Estudante 127 Tuir Teste Iha MNEK Sai Protokolu Iha Komemorasaun Konsulta Populár

Formasaun ne’e hodi prepara ekipa protokolár ba komemorasaun loron konsulta popular (Referendu) ba dala-20 (30 agostu 1999-30 agostu 2019) no prezensa misaun forsa INTERFET, 20 setembru 1999.

Estudante universitáriu ne’ebé selesionadu ne’e mai hosi Universidade Nasionál Timor-Lorosa’e (UNTL), Universidade da Paz (UNPAZ), Universidade Dili (UNDIL) Universidade Oriental Timor Lorosa’e (UNITAL), DIT (Dili Institute of Technology).  Sira hotu sei tuir formasaun to’o loron 14 agostu 2019.

Ministru Negósiu Estranjeiru no Kooperasaun (MNEK), Dionísio da Costa Babo Soares, hato’o agradese ba kontribuisaun   estudante sira nian ho voluntária disponivel  tuir formasaun ne’e no bele aproveita esperiénsia di’ak ne’e.

Nia husu estudante sira atu hatudu responsabilidade iha prosesu tomak, tanba ba futuru estudante sira mak  sei  reprezenta Timor-Leste.

Ministru Dionísio Babo  iha konfiansa ba estudante sira, tanba durante ne’e mós aprende siénsia no matenek iha universidade ne’ebé sira haknaar ba.

Iha fatin hanesan Koordenadór Protokolu no Serimoniál iha komemorasaun ba eventu loron konsulta populár, Madalena Viegas Filipe hatete, objetivu hosi formasaun ne’e estudante sira bele integra aan iha prosesu maneira protokolu no serimoniál ho  didi’ak.

Nia esplika, durante formasaun ne’e oradór sira sei  lori matéria ho tema sira primeiru kona-ba  istória jerál, oinsá mak protokolu ne’e mosu, no diferensa protokolu ho étika protokolu ba setór privadu no governu nian, protokolu ba mídia atu sai karakterístika pesoa protokolu halo nusa no haree ba orden prezidénsia katak ema ne’ebé iha sasukat kle’an sei haree iha serimoniál sasán saida mak mosu ba aplikasaun regra protokolu nian no seluk tan.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here