Ministériu Negósiu Estranjeiru no Kooperasaun (MNEK). Foto: MNEK

DILI, 12 jullu 2019 (TATOLI)- Ministériu Negósiu Estranjeiru no Kooperasaun (MNEK) hahú halo selesaun ba estudante universitáriu sira hamutuk na´in 127 atu sai pesoa protokolár hodi haforsa servisu protokolu nian iha MNEK ba komemorasaun tinan 20 loron Konsulta Populár no komemorasaun tinan 20 forsa INTERFRET (International Forces For East Timor)-forsa manutensaun paz nian, to´o iha Timór, iha 20 setembru 1999.

Diretór Jerál ba Asuntu Konsuladu no Protokolu MNEK, Juvinal de Jesus Martins informa, MNEK mós hola parte ba iha komemorasaun loron Konsulta Populár ba tinan, ne’ebé toma responsável ba iha protokolu atu tau-matan ba VIP (Very Important Person-Ema Importante Liu) sira ne´ebé sei partisipa iha serimónia importante ne’e. Tanba ne´e mak MNEK halo teste entrevista ba estudante na´in 127 hodi hatene sira-nia kapasidade atu koloka sira ba ne’ebé.

Dezde semana kotuk MNEK hahú halo selesaun eskrita ba universitáriu sira husi universidade hanesan UNTL (Universidade Nasionál Timor Lorosa´e), UNDIL (Universidade Dili), UNPAZ (Universidade da Paz) no UNITAL (Universidade Orientál Timor Lorosa´e) hodi bele halo kna´ar hanesan protokolu ajuda protokolu MNEK hodi haree konvidadu sira ne’ebé mai husi rai li´ur iha komemorasaun loron Konsulta Popular 30 Agustu tinan ne’e.

“Ami-nia ema mós limitadu tanba ne’e maka ami konvida husi universidade sira para sira-nia ema sira ne’ebé maka estuda iha área relasaun internasionál, turizmu bele mai ajuda ami para bele simu ita-nia bainaka sira atu mai ne’e,” hateten Diretór Juvencio de Jesus Martins ba Ajénsia TATOLI iha MNEK, Praia dos Coqueiros, sesta (12/07/2019).

Nia esplika, estudante na´in 127 ne’e sei fahe ba kategória tolu. Kategoria primeiru maka protokolu sira ne’ebé besik liu no lori VIP; sira ne’ebé hatene lian inglés ka portugés, sira akompaña konvidadu sira husi CPLP (Comunidade dos Países da Língua Portuguesa), kategória segundu maka sira ne’ebé iha sala laran atu fó asisténsia no kategória terseiru maka sira ne’ebé atu fo asisténsia lojístika durante serimonia; iha fatin serimónia tanba sei iha jantar  no almosu.

“Tanba ne’e maka ami ohin halo ona entrevista atu hatene sira, koloka sira iha kategória saida iha servisu protokolu nian,” dehan diretór ne’ebé trata asuntu ba konsuladu no protokolu ne’e.

Nia haktuir, MNEK presiza protokolu na´in 127 maibé balun la mai ho nune’e sei haree sira ne’ebé la mai iha selesaun protokolu ne’e, MNEK sei haree hodi substitui ema hirak ne’e.

Estudante sira ne’ebé maka MNEK halo selesaun hodi sai protokolu ne´e prepara ba eventu importante tolu tinan ne´e liliu liga ba loron konsulta populár rasik, komemorasaun tinan 20, forsa INTERFET to´o iha Timór inklui mós eventu ba ekipa “Fact Finding” ka buka faktu ASEAN (Organizasaun Sudezte Aziátika-sigla inglés) nian, ne´ebé sei iha setembru tinan ne´e hodi avalia kona-ba prontidaun Timor-Leste ba adezaun iha ASEAN.

Notísia relevante: http://www.tatoli.tl/2019/06/komemora-konsulta-popular-ho-programa-edukativu-kultural-no-rekriativu/

http://www.tatoli.tl/2019/06/primeiru-ministru-lansa-progarama-komemorasaun-tinan-20-konsulta-popular/

http://www.tatoli.tl/2019/06/komemorasaun-loron-konsulta-popular-sei-selebra-iha-territoriu-tomak/

Jornalista            : Natalino Costa

Editór                  : Rafy Belo

HAKEREK NO HATÁN

Please enter your comment!
Please enter your name here