Jornalista timoroan sira hasai foto hamutuk ho Eis-lider Rezisténsia, Kay Rala Xanana Gusmão. Foto espesiál

DILI, 11 agostu 2019 (TATOLI)—“Imi timoroan?” “Los! Ami timoroan.” “Entaun, tuir ha’u.” Maibé, Maun Aderito Hugo da Costa sei sama ha’u-nia ain hodi bisi-bisi dehan, “Labele fiar lalais lai tenke kuidadu”. Maibé, mana ne’e kala haree ami sei dúvida, nia dehan, “Keta ta´uk! Ha’u buka hela timoroan sira para fila ba Timor.”

Mana ne’e husu fali, “Imi serbisu saida.” Ami hatán, “Ami jornalista”. “Entaun, imi tenke ba lalais Timor. Maun Boot Xanana haruka sira ne’ebé serbisu nu’udar jornalista, Yayasan HAK, doutór no ONG Human Rights nian, tenke fila ona para ajuda haree situasaun iha ne’ebá (Timor Timur).”

Dialogu badak entre timoroan ho timoroan iha leten ne’ebá ne’e, akontese iha Jakarta-Indonézia iha tinan 20 liubá ne’e. Esperiénsia ne’e haktuir husi jornalista timoroan, jornalista Suara Timor-Timur (STT), Suzana Cardoso, ba Ajénsia TATOLI iha Domingu (11/08/2019).

Husi hahú nia tama iha mundu jornalizmu (1994), ninia dedikasaun nu’udar jornalista ba luta autodeterminasaun signifikante tebes. Nu’udar jornalista no ativista feto, dalabarak nia uza sentimentu nu’udar feto timoroan ne’ebé hakarak ukun rasik aan no hakarak kaer kuda talin rasik.

Atu haer kuda talin rasik, ninia dedika aan serbisu nu’udar jornalista hodi halo kobertura ba akontesimentu sira ne’ebé akontese iha Timor-Timur, liuliu akontesimentu kruel sira ne’ebé akontese iha prosesu Konsulta Populár (referendu) 30 Agostu 1999.

Isin-Lolon Iha Vila, Kakutak GPK

Iha ambítu komemorasaun loron Konsulta Populár ba dala-20 (39 Agostu 1999-30 Agostu 2019), Eis Jornalista Suara Timor-Timur (STT) no Fundadora Jornál Timor-Post, Suzana Cardoso, haktuir ninia espereiénsia no dedikasaun, liliu, liuhusi halo atividade jornalizmu halo kobertura ne’ebé hasoru dezafiu oin-oin no hakerek notísia kona-ba Konsulta Populár 1999 hodi publika iha Jornál Suara Timor Timur (STT) no mídia estranjeiru sira.

“Ha’u-nia dedikasaun nu’udar jornalista ba referendu (Konsulta Populár 1999) dala barak uza sentimentu nu’udar timoroan ne’ebé hakarak ukun rasik aan.Tanba ha’u mós nu’udar ativista iha Universitas Timor-Timur (UNTIM). Iha momentu ne’ebá ha’u nu´udar estudante Fakuldade Sosiál Polítika ne’ebé loro-loron sempre hala’o demonstrasaun hela de’it to’o asiste no kontribui ba harii Dewan Solidariedade Mahasiswa Pemuda Pelajar Timor Timur (DSMPPTT) no kontribui ba halo asaun demonstrasaun,” haktuir jornalista seniór Suzana Cardoso ba Ajénsia TATOLI.

Tanba ne’e, nu’udar ativista pro-independénsia no nu’udar jornalista ida, entaun notísia ne’ebé ha’u hakerek, barak liu mai husi fontes pro-independénsia ne’ebé publika iha Jornál Suara Timor-Timur (STT). Nune’e, nu’udar jornalista ba Suara Timor Timur (STT), ami-nia prezensa iha maluk ativista ba ukun aan ninian, hetan privilejiu liu para asesu ba fontes prinsipál sira, gerilleiru sira iha ai-laran ka iha fatin Akantonamentu Waimori, Viqueque.

Maibé mós, la taka dalan, nu’udar jornalista independente, ami mós halo kobertura ba pro-autonomia sira-nia atividade iha prosesu Konsulta Populár 30 Agostu 1999 iha Timor-Timur. Nu’udar jornalista, ami mós sai sasin bainhira Eurico Guterres ho João Tavares harii grupu milísia no akontesementu kruel sira ne’ebé grupu milísia sira ne’e hala’o iha Timor-Timur (1999) hafoin Prezidente Indonézia, B. J. Habibie fó sai opsaun rua; hili autonomia ka ukun aan iha 27 Janeiru 1999 to’o mai iha anunsia rezultadu Konsulta Populár 4 Setembru 1999.

Entrevista Fontes Prinsipál  Sira

Iha momentu ne’ebá, ema hotu-hotu ne’ebé hakarak fó entervista prinsipál hotu. Tanba, liliu fontes husi pro-indepenmdénsia nia rezultadu entervista sempre sai ameasa boot ba sira no sira-nia familia husi Bapak sira. Maibé konsege halo kobertura ba atividade prinsipál sira ne’e maka importante no asaun perigu sira ne’e mak importante.

Iha momentu ne’ebá, la’ós fontes maka sai ami-nia notísia maibé asaun no atividade sira maka sai ami-nia notísia ba Suara Timor Timur. No, mensajem hirak ne’e la’ós natoon publika de’it iha STT maibé  mós haruka ba ajénsia nitisioza sira iha rai li´ur mak hanesan Kyodo News, Reuters  nomós jornál Suara Pembaharuan Indonézia.

Tanba ne’e maka tantu milísia pro-autonomia no pro-CNRT ka pro-independénsia ninia atividade hotu-hotu, sai notísia prinsipál ba ami no sai xave ne’ebé bele hatán ba asaun no timoroan nia hakarak hirak ne’ebé atu hili autonomia hamutuk ho Indonézia ka hili CNRT (Conselho Nacional da Resistência Timor) hodi haketak aan hosi Indonézia, maka Komandu da Luta, Kay Rala Xanana Gusmão.

“Tanba ne’e, ha’u ne’ebé nunka haree sé maka Xanana no lahatene atu entervista oinsá nian, habrani aan hodi ba entrevista Xanana. Husi ne’ebá maka bele counter hotu manipulasaun informasaun husi pro-autonomia katak Xanana mós hakarak hili autonomia,” Suzana haktuir.

“Ha’u entrevista Xanana Gusmão iha Komarka, Cipinang, Jakarta, Indonézia (data ha’u haluha). Hafoin rezultadu entrevista ne’e publika iha Suara Timor Timur (STT), ha’u hetan ameasa husi ema pro-autonomia sira dehan ho liafuan hodi tolok Xanana katak, ‘ternyata badannya di Kota, otaknya GPK (Gerakan Pengacau Keamanan)’—‘afinál ninia isin-lolon iha vila laran maibé ninia kakutak ne’e kakutak GPK’,” nia fó hanoin hikas.

Esperiénsia Midar No Moruk

Esperiénsia midar ne’eb’e ha’u hasoru ka hetan maka kontente bainhira ha’u-nia notísia bele responde ema seluk nia preokupasaun bele fó sai akontesementu ne’ebé akontese ne’e ho loloos no momoos. Tanba iha momentu ema ida atu foti desizaun ba nia moris tenke barak liu haree husi provas ka asaun ne’ebé sai hanesan alvu ida hodi deside atu ukun aan ka atu mantein ho Indonézia.

Esperiénsia moruk ne’ebé nia hetan maka bainhira halo kobertura iha atividade perigu nia laran no barak loos tantu bainhira halo kobertura iha parte pro-autonomia nian no parte pro-independénsia nian. Maibé, esperiénsia moruk barak liu maka hetan ameasa husi Bapak sira ho pro-autonomia sira.

Hafoin Anunsia Rezultadu Referendu

Tanba sai ona sasin ba akontesementu barak no sai ibun no lian ba ema barak entaun ha’u-nia aan mós iha perigu nia laran. Kuandu ha’u hetan ameasa ka buat ruma ha’u-nia família mós sei la nonook no ida ne’e fó ameasa ba ha’u-nia família. No, maluk timoroan ida, Tentara Nasional Indonesia (TNI) husi batallaun 744, fó hateten ba ha’u tenke sai husi Timor Timur tanba ha’u-nia naran mós tama iha lista mean.

Husi ameasa ne’e, tanba durante ne’e ha’u haruka notísia rai laran ba rai liur liuliu ba Japaun entaun iha momentu ne’eba Embaxada Japaun aluga aviaun espesiál ida ba ema Japaun no ema hirak ne’ebé serbisu ho sira. Tantu ba ema sira ne’ebé mak foin maka serbisu loron ida ou semana ida ka serbisu dasa-rai ka serbisu saida de’it maka kontribui ba sira, Governu Japaun, haruka sai hotu husi Timor Timur.

Entaun, ha’u-nia apa dehan; ”Ó tenke sai hodi ami book aan livre. Se lae, ami book aan ladi´ak tanba preokupa ba ó-nia visa”. Entaun, ami dezloka ba Jakarta iha 4 Setembru 1999, hafoin anunsia rezultadu referendu.

Maske, iha biban ne’ebá, ha’u ho motor atu ba foti roupa liuhusi Delta ba check Xefe Biro Jornal Japaun, Nikkie Shimbun, iha Delta hetan asaltu husi milísia. No, sorte, Polisia Penerangan Polda Timor-Timur, maka salva hodi hateten ba milísia sira; “Jangan, jangan… Ini orang tua kita.” Milísia sira dehan, “Orang kita apa dia mau makan…” hodi tolok lia fuan aat ba Maun Boot Kay Rala Xanana Gusmão.

No, ikus mai ho laran triste tenke fahe malu ho família, ha’u mesak ho maluk Jornalista Suara Timor-Timur (STT) ne’ebé agora hamutuk iha Timor Post (Aderito Hugo da Costa, Santina Araujo, Rosa Garcia, João Barreto, Otelio Ote, Lourenço Vicente Martins no ha´u Suzana Cardoso) dezloka ba Jakarta. Tanba ami sira jornalista iha STT ne’e, jornalista husi parte ne’ebé de’it inklui Japaun fiar maka ami. Tanba, ami mak bele asesu ba fontes pro-independénsia no fó sai buat ne’ebé loos tuir lia-loos.

Nu’udár jornalista, durante semana tolu (3) iha Jakarta, ha’u halo serbisu iha Kantor Nikkei Shimbun Japaun nian, Biro Jakarta, halo entervista ba timoroan sira ne’ebé dezloka ba Indonézia, tantu pro-autonomia no pro-independénsia. Inklui ba halo kobertura bainhira ema hasai Xanana husi Prizaun Cipinang, Jakarta, Indonézia.

Iha ne’ebá, ami hela hamutuk uma ida no atu sai mós tenke hafuhu rai hodi buka dalan tenke fila mai Timor. Tanba ta´uk Bapak sira, entaun, ami konsege buka dalan atu sai husi Jakarta depois maka tama fali mai Timor. Ami tenke fila mai Timor no hanoin para loke jornál.

Iha Jakarta, ami tuur hamutuk hanoin atu loke jornál ho naran Dili Post. To’o ami la’o buka ema tulun ami para bele fila mai Timor, iha fatin ida ha’u haluha ona, ami hasoru Mana Emilia Pires maka ne’e ou pokoknya iha ema ida ne’ebé husu ha’u ho Maun Hugo da Costa, buka hela ema balun atu ajuda ami.

Derepente, nia besik ami, nia husu, “Imi timoroan.” “Los! Ami timoroan.” “Entaun, tuir ha’u.” Maibé, Maun Hugo sei sama ha’u-nia ain hodi bisi-bisi dehan labele fiar lalais lai tenke kuidadu. Maibé, mana ne’e kala haree ami sei dúvida, nia dehan, “Keta ta´uk! Ha’u buka hela timoroan  sira para fila ba Timor.”

Mana ne’e husu fali, “Imi serbisu saida.” Ami hatán, “Ami jornalista”. “Entaun, imi tenke ba lalais Timor. Maun Boot Xanana haruka sira ne’ebé serbisu nu’udar jornalista, Yayasan HAK, doutór no ONG Human Rights nian, tenke fila ona para ajuda haree situasaun iha ne’eba (Timor Timur).”

Ami kontente tebes. Ami rejistu hotu ami-nia naran no ami mak sa’e aviaun primeiru ne’ebé mai husi Jakarta-Indonézia tun diretamente iha Baucau. Ami to’o iha Baucau, ami hetan tuda husi populasaun sira katak ami mós membru milísia ruma karik. No, durante fila mai, ami sempre hala’o nafatin vida jornalista nian. Ha’u ba halo kobertura iha Radio UNTAET hodi haruka ba Austrália no ikus mai, ami harii jornál Timor Post iha 29 Fevereiru 2000.

Hafoin Indonezia fila, to’o ohin loron, ha’u raan jornalista. Ba ha’u. jornalista iha tempu ukun-aan no tempu okupasaun Indonézia, hanesan de’it maibé situasaun maka diferente. Iha tinan 1999 nu’udar jornalista timoroan no mós ativista ukun aan nian ho notísia diferente katak oinsá para ema hotu-hotu, tantu ema Indonézia, timoroan ka ema hotu-hotu iha mundu ne’e, nia hanoin katak só úniku ukun aan maka dalan di’ak liu ona ba timoroan sira.

Maibé iha 2000, hafoin haketak aan husi Indonézia, hotu-hotu hanoin saida maka atu halo ba Timor ne’e ho Timor ne’ebé ema sunu-mutuk sai aku-desan, rai-rahun folin laek. Ha’u hanoin tenke bolu ha’u-nia familia sira ne’ebé Bapak lulun hotu ba Atambua. Hafoin voluntáriu serbisu nu’udar jornalista iha Rádiu UNTAET no ami sira ne’ebé jornalista iha STT la soe malu, to’o ikus mai, ami harii Jornál Timor Post ho kapasidade mákina fotokopia ne’ebé hetan apoiu husi USAID.

Ne’ebé, nu’udar jornalista laiha situasaun idaké ita prefere di’ak liu fali situasaun seluk maibé ita hatuur aan nu’udar jornalista ne’ebé maka profesionál. Katak, ha’u hakerek notísia tenke tuir duni ha’u ida ema timooan [hein livru ne’ebé ha’u hakerek ne’ebé interesante no imi lee mós furak maske ho lian Indonézia. Daudaun ne’e iha Indonézia ne’ebá mós, eme ne’ebé booking livru ne’e maizumenus ema 500 ona].

Lia-Tatoli

Iha tinan 2017, Konsellu Imprensa (CI) fó ona apresiasaun hodi fó sertifikadu de onra ba  jornalista sira ne’ebé mak mate iha Timor-Leste mak hanesan; Saudozu Bedino (Joaquim Bernadino Guterres), Reporter Radio Matebian no Jornalista Vox Populi, hamutuk ho jornalista nasionál no internasionál sira seluk, inklui Roger East (Australian Associated Press), Malcolm Harvie Rennie (TV. Chanel 9), Francisco Borja da Costa, Gregory John Shackleton (TV. Chanel 7), Gary James Cunningham (TV, Chanel 7), Brian Raymond Peters (TV. Chanel 9), Anthony John Stewat (TV. Chanel 7), Kamal Ahmed Bamadhaj (Columnist for Asian Time), Sander Robert Thoenes (Financial Times).

Karik, iha ambítu Komemorasaun Loron Konsulta Populár ba dala-20 (30 Agostu 1999-30 Agostu 2019) ne’e, estadu no governu Timor-Leste iha hanoin atu fó apresiasaun ka rekuñesimentu ba jornalista timoroan sira ne’ebé  sei moris, ne’ebé iha 1999 dedika aan hodi hatete lia-loos ba mundu liuhusi sira-nia notísia sira?

Eis jornalista Suara Timor Timur, Suzana Cardoso, hatan hamnasa. “Hi-hi-hi. Ami la ezije maibé kebiasaan ema kriatura maka fó valoriza ema seluk bainhira iha loron ikus. Katak, nia mate ona maka foin fó rekuñesimentu. Satán ita ema timoroan, fó rekuñesimentu ba ema ka jornalista ne’ebé mate ona no nia kontribuisaun dala ida de’it. Nune’e, se estadu bele fó penghargaan ba diplomata ema estranjeiru, ema sira iha kaixa klandestina, Falintil, no seluk tan, nusa maka la fó mós ba ami sira be jornalista hola parte iha rede klandestina mós,” Suzana tatoli ba ukun na’in sira atu tau iha konsiderasaun.

Notísia relevante:Rai-Hún Mutin Sa’e Daudaun Ona..! (XIV)

Jornalista:Cancio Ximenes

Editór     : Rafy Belo

HAKEREK NO HATÁN

Please enter your comment!
Please enter your name here