Komandante Jerál PNTL, Komisáriu Faustino da Costa ho Vise Ministra Saúde ba Kuidadu Saúde Primaria, Elia A.A. dos Reis, tesi fita hodi lansa apoia ró Polisia Unidade Marítima (UPM) ba Ministériu Saúde, iha Portu UPM, Lecidere, Dili, sesta (09/08/2019). Imajen/Eugénio Pereira

ATAURO, 10 agostu 2019 (TATOLI)-Atu ajuda fasilita transporta moras sira hosi Postu Administrativu Atauro mai Dili, sesta (09/08/2019), Ministériu Saúde (MS) estabelese akordu kooperasaun ho  Komandu Polisia Nasionál Timor-Leste (PNTL) ho hodi apoia ró ida hosi Unidade Polisia Marítima (UPM) nian.

Notísia Relevante : Moras Infesaun Vias Respiratória Rejistadu Aas Iha Atauro

Vise Ministra Sauúde, Elia dos Reis ho Komisáriu Faustino da Costa, sesta (09/08/2019), estabelese akordu servisu hamutuk hodi fasilita ró ida hosu UPM nian fasilita tula pasiente hosi Atauro mai Dili. Imajen/Eugénio Pereira

Akordu ne’e asina diretamente hosi Komandante Jerál Polísia Nasionál Timor-Leste (PNTL), Komisáriu Faustino da Costa ho Vise Ministra Saúde ba Kuidadu Saúde Primaria, Elia A.A. dos Reis, iha Atauro.

Hafoin asina akordu ne’e, Komisáriu Faustino da Costa ho Vise Ministra Elia A.A. dos Reis,   halo kedas lansamentu ba operasaun ró refere ne’ebé asiste mós hosi komunidade Atauro.

Komisáriu Faustino esplika, akordu ne’e nu’udar kontinuasaun hosi kooperasaun entre Komandu PNTL-UPM no Ministériu Saúde bele fó asisténsia emerjénsia bainhira komunidade sira iha Atauro presiza.

Iha fatin hanesan, Vise Ministra Elia dos Reis, hato’o agradesimentu ba Komandu PNTL nian apoiu hodi fasilita programa MS nian lori saúde besik ba povu no fasilita povu atu asesu ba saúde.

Autoridade seguransa no komunidade Postu Administrativu Atauro simu vizita Komandante PNTL, Komisáriu Faustino da Costa ho Vise Ministra Saúde ba Kuidadu Saúde Primaria, Elia A.A. dos Reis, iha Atauro Vila, sesta (09/08/2019). Imajen/Eugénio Pereira

Elia dehan, Atauro illa ida importante hosi Munisípiu Dili durante ne’e komunidade sira moras dala ruma ró susar buka atu transporta moras mai Dili, tanba ne’e kria  kooperasaun ho PNTL.

“Ministériu Saúde agradese ho akordu kooperasaun ne’e hodi tulun ona povu Atauro nia preokupasaun,” Elia agradese.

Iha fatin hanesan, Komandante UPM, Superintendente Xefe, Lino Saldanha, ho orgullu hateten, ekipa UPM prontu ezekuta no koopera iha kualkér servisu atu atende komunidade sira.

Nia dehan, dezde UPM harii, mezmu akordu la iha, maibé UPM fasilita hela ró tula pasiente ne’ebé sofre moras mai Dili no ho akordu ne’e hametin liután liña servisu.

Limpeza Jerál iha Atauro

Durante estadia iha Atauro, Komandu PNTL, Komandu F-FDTL, Ministériu Saúde,  Komisaun Regulariza Arte Marsiál (KRAM) no autoridade no komunidade sira realiza mós atividade limpeza jerál iha Portu Tasi ibun Atauro ba too Merkadu nu’udar parte ida hosi programa “Dili Livre Husi Publisidade La Edukativu, Moos no Seguru” ne’ebé implementa mós iha Atauro.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here