Membru MKOTT sira iha ámbitu konferénsia imprensa hodi lansa petisaun públiku atu solidariza Bernard Collaery ho Witness K. Foto TATOLI: Nelia Fernandes

DILI, 10 agostu 2019 (TATOLI)-Movimentu Kontra Okupasaun Tasi Timor (MKOTT) konsidera kazu Bernard Collaery ho Witness K, parte integrante husi prosesu luta Fronteira Marítima Timor-Leste (TL) nian tanba ne´e labele esklui.

“Esklui sira hanesan; primeiru, ita hanesan bosok ita-nia aan, segundu ita tau risku no kores ba iha istória luta ba rezisténsia kontra okupasaun Austrália nian. Ne’ebé, ita labele nega ida ne’e, parte integrante ba ita-nia história,” hateten Membru  MKOTT no Peskizadór ida iha Organizasaun La´o Hamutuk, Celestino Gusmão iha salaun Yayasan Hak iha fim-de-semana ne´e.

Membru MKOTT ne´e dehan,  ita bele orgullu ita bele selebra katak povu Timor-Leste manan iha batalla naruk ida ne’e. Ita mós labele nega kona-ba ita-nia maluk solidaridade internasionál sira inklui Bernard Collaery ho Witness K nia kontribuisaun boot ne’ebé ita hetan.

Nia mós haktuir, nu´udar sosiedade sívil sira hasoru malu ona mós ho Prezidente Repúblika no husu mós ba prezidente atu labele haluha Bernard Collaery ho Witness K.

Peskizadór La´o Hamutuk no Membru MKOTT, Celestino Gusmão mós kompromete karik MKOTT iha oportunidade hasoru Primeiru-Ministru no Parlamentu Nasionál sei hato´o mós hanoin ne´e. “Kona-ba Parlamentu ami (MKOTT) seidauk hasoru no Primeiru Ministru ami seida’uk hasoru, se ita ezizi atu hasoru, husu Primeiru Ministru atu halo buat ruma ba ida ne’e”.

Nia akresenta: “Maun Boot Kay Rala Xanana Gusmão ami hatene katak ninian pozisaun klaru atu apoiu kolega na’in ruan ne’e. Nia ko’alia tiha ona iha Portugal, ko’alia ona iha fatin seluk tiha ona, kona-ba kolega na’in rua ne’e”.

“Ami la ezije atu halo kampaña ne’ebé mak boot tuir saida ami-nia hakarak maibé ami mós husu bele halo buat ruma para sira na’in rua nia moris ne’e labele krusifikadu,” espera membru MKOTT, Celestino Gusmão.

Notísia relevante:MKOTT Halo Petisaun Ba Austrália Hapara Prosekusaun Judisiál  Hasoru Bernard Collaery Ho Witness K

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here