Públiku atus ba atus entuziasmu ba asina mensajen solidariedade solidariza advogadu Bernard Collaery no Witness K, iha posku konsentrasaun MKOTT, jardin Liceu. Foto FB: Ryo Loriku Lialuli

DILI, 09 agostu 2019 (TATOLI)-Movimentu Kontra Okupasaun Tasi Timor (MKOTT) lansa petisaun públiku, hahú ohin (09/08/2019) to’o finál agostu, hodi husu ba Federal Attorney General Australia nian, Christian Porter, atu hapara prosekusaun judisiál hasoru advogadu Australianu Bernard Collaery ho Witness K.

“MKOTT espresa ona ninia hakfodak boot ho prosekusaun ida ne’e, ne’ebé MKOTT argumenta katak só ditadór Soeharto, Eis-Prezidente Indonézia ne’ebé invade no okupa Timor-Leste, mesak mak bele halo no kondena prosekusaun ida ne’e nu’udar ataka ida ba liberdade espresaun no ba demokrasia,” refere komunikadu imprensa TATOLI asesu husi MKOTT iha sede yayasan Hak Farol, Dili, sesta ne’e.

MKOTT, bazeia ba komunikadu ne’e, husu ba Austrália nia Attorney General atu hapara prosekusaun ne’ebé la’o hela. “Tanba ne’e duni mak ami halo petisaun atu ita boot invoka autoridade ne’ebé Australian Judiciary Act 1903 Section 71 fó atu hapara tiha prosekusaun hasoru Bernard Collaery ho Witness K,” insiste.

Iha komunikadu ne’e mós, MKOTT akresenta katak Timor-Leste prepara hela atu selebra aniversáriu referendum ba dala-20 bainhira timoroan sira vota esmagadoramente atu ukun rasik aan husi Indonézia nia okupasaun. Iha okaziaun ida ne’e, Timor-Leste ho Austrália mós sei ratifika tratadu ba fronteira marítima entre rai rua.

“Loron 30 fulan agostu tinan 2019 sei marka mós instánsia importante iha relasaun bilaterál entre Timor-Leste ho Austrália ho ratifikasaun ba tratadu fronteira marítima nasaun rua ne’e nian. Kestaun ida ne’ebé dezde 1999 sai tiha pontu tensaun ida iha ita-nia relasaun”.

“MKOTT hein hela petisaun ida ne’e sei asina husi pelumenus ema timoroan na’in rihun ida to’o fulan agostu nia rohan” espera MKOTT.

Notísia relevante: MKOTT Halibur Asinatura Rihun Hodi Solidariza Bernard Collaery-Witness K  

MKOTT Entrega Asinatura Solidariedade 1.300 Resin Ba Austrália

Jornalista: Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here