Prezidente Repúblika (PR), Francisco Guterres Lú Olo. Imajen Mídia PR

DILI, 9 agostu 2019 (TATOLI)—Prezidente Repúblika (PR), Francisco Guterres Lú Olo presta omenájen ikus ba saudozu José Cirilo ‘Maubrani’, iha Postu Administrativu Maubara, Munisípiu Liquiçá, ohin.

Iha mensajen PR Lú Olo, dehan lakon saudozu José Cirilio Nunes “Maubrani” halo família hahú moris ho laran-susar no matan-been. Povu Timor-Leste mós lakon oan murak ida.

Lee mós:

Liafuan Ikus Saudozu Maubrani: “Render Não, A Última Bala Será Para Mim”

Administrasaun Liquiçá Hasai Sirkulár Hasa’e Bandeira Meia Haste Ba Saudozu Maubrani

“Ha’u sente triste hanesan mós oan sira no família rasik sente. Maibé, sentimentu ida ne’e kahor mós ho orgullu boot tebe-tebes ida. Ita hotu sente orgullu tanba saudozu Maubrani desidi fó-án tomak ho brani ba ita-nia kauza nasionál:  UKUN RASIK-AN”, PR hato’o nia mensajen, iha Maubara, sesta ne’e.

Hafoin hetan liberdade expresaun iha tinan 1974,  nia haktuir, saudozu Maubrani fó-án  kedas ba kauza nasionál ne’e  liuhosi  ASDT/ FRETILIN. Saudozu prova ninia dedikasaun ba kauza ne’e ho hahalok barak, liliu iha komponente armada. Ho ninia kapasidade no matenek rasik, saudozu ne’e partisipa iha rezisténsia organizada nu’udar Komandante Setór Sentru Leste no Komandante Brigada de Choque.

Tuir kombatente sira, saudozu fanun-án beibeik ho lia fuan brani tuir mai: “RENDER NÃO ME RENDO, A ÚLTIMA BALA É PARA MIM” ( HA’U SEI LA RENDE, KILAT MUSAN IKUS LIU HA’U-NIAN). Lia fuan sira ne’e fó-hanoin lia-menon ho sentidu hanesan hosi  Prezidente Nicolau Lobato: “HEI-DE MORRER DE ARMAS NA MÃO” (HA’U SEI MATE HO KILAT IHA LIMAN) no “A ÚLTIMA  BALA É A MINHA VITÓRIA” (KILAT MUSAN IKUS LIU MAK HA’U NIA VITÓRIA).

Eroi rua ne’e, tuir Xefe Estadu, mate iha momentu luta no fatin oin seluk maibé se án ba mate ho espíritu  ida de’it: Lakohi rende ba inimigu. Espíritu ida ne’e mak buras iha tempu ne’ebá no habrani aswa’in sira atu luta nafatin.

Iha 28 novembru 2006, Estadu Timor-Leste kondekora Saudozu Maubrani nu’udar kombatente ne’ebé harii/funda  Movimentu Libertasaun Nasionál.

Hamutuk ho família, Estadu Timor-Leste sei  haloot saudozu ninia restu mortál iha Jardim dos Herois da Pátria, iha Metinaro, fatin ne’ebé fó-hanoin pasadu eróiku no hamanas laran atu haree ba futuru ho fiar-metin katak Timor-Leste sei manán luta hasoru ki’ak.

“Ita hotu reza ba nia klamar atu hakmatek iha reinu lalehan no inspira ita nafatin atu hadomi Pátria no Povu,” katak Prezidente Repúblika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here