Membru Forsa Armada hulan saudozu Maubrani nia mate-isin hatuur iha fatin ne’ebé indikadu iha Maubara. Imajen Tatoli/Evaristo Soares Martins

MAUBARA, 9 agostu 2019 (TATOLI) – Administrasaun Munisípiu Liquiçá hasai sirkulár hasa’e bandeira Meia Haste ba saudozu Segundu Komandante Brigada Choque Nasionál, José Cirilo Correia da Silva Nunes alias Maubrani.

Vise Koordenadór Komisaun Organizadora atuál Administradór Postu Administrativu Liquiçá Vila, Renato Nunes Serrão, informa  bandeira hasa’e iha riin-klaran ka meia haste ne’e orientasaun hosi administrasaun Munisípiu Liquiçá.

Bandeira meia haste, Imajen Tatoli/Evaristo Soares Martins

“Administrasaun Munisípiu hasai sirkulár ne’e la’ós ba komunidade Maubara de’it, maibé ba mós Postu Liquiçá Vila ho Bazartete. Ho sentidu atu fó onra última omenajen ba ita nia eroi sira, liliu ba saudozu Maubrani”, nia tenik iha Maubara, sesta ne’e.

Nia dehan, sirkulár ne’e hasai hahú hosi loron 7 to’o 10 agostu, komunidade iha Liquiçá iha obrigasaun hasa’e bandeira Repúblika Demkrátika Timor-Leste (RDTL) ho meia haste.

Tuir ajénda Prezidente Repúblika (PR), Francisco Guterres Lú Olo mós presta omenajen ikus ba saudozu Maubrani, iha Maubara no ne’ebé sei haloot iha Jardim dos Herois Metinaro.

Tuir observasaun, Sekretáriu Jerál Partidu FRETILIN, Marí Alkatiri mós presta omenajen ba saudozu Maubrani.

Oras ne’e família saudozu, komunidade Munisípiu Liquiçá no veteranu sira hamutuk iha Maubara Vila, hafoin aban ba haloot iha Metinaro.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here