Diretora Kompañia JONIZE UNIP LDA, Maria F. S. C. Oliveira, asina nota entrega apio osan US$20.000 ba Klínika Bairru-Pité, Sesta (14/6/2019). Imajen/Agapito dos Santos

DILI,14 juñu 2019 (TATOLI)-Atu hakmaan krize finanseira ne’ebé klínika Bairru-Pité  enfrenta durante ne’e, ohin, kompañia nasionál, ZONIZE UNIP, LDA, apoiu osan US$20.000 ba klínika refere.

Diretora Kompañia JONIZE UNIP LDA, Maria F. S. C. Oliveira hatete, asaun solidariedade ne’e nu’udar umana buka fó tulun malu hodi salva ema nia vida liuhosi atendimentu saúde ba públiku iha Klínika Bairru-Pité.

“Ha’u akompaña informasaun hosi media no ha’u mai kedas Klínika Bairru-Pité para atu fo tulun no ohin ha’u mai fó tulun,” informa Maria Oliveira ba Jornalista sira hafoin entrega apoiu orsamentu ne’e ba Diretór Klínika Bairru-Pité,  dr. Daniel Murphy.

Ho apoiu ne’e, nia espera sei hakmaan problema ne’ebé klínika enfrenta, maibé nia husu ba kompañia nasionál sira seluk atu fó mós tulun.

Diretór Daniel Murphy, orgullu depois simu tulun hosi kompañia timoroan ne’e tanba konsidera sai ezemplu di’ak ba Timoroan seluk mós atu fó tulun.

“Ha’u kontente rona ida ne’e, tanba inisiativa kapás tanba servisu iha timor ho osan ne’ebé sira hetan fó fila fali ba komunidade,” hateten Daniel Murphy.

Biban ne’e,  Jestór Klínika Bairru-Pité, Inacio dos Santos ba Ajénsia TATOLI informa, ohin hetan ona kontaktu hosi Gabinete Primeiru-Ministru ba asuntu  sosiedade sivíl atu fó tulun ba problema ne’ebé enfrenta.

“Ami hetan ona kontaktu hosi Gabinete sosiedade sivíl, Gabinete Primeiru-Ministru nian katak segunda (17/06), ami sei ba hasoru hodi ko’alia,” Inacio dos Santos hateten.

Jornalista      : Agapito dos Santos

Editór            : Francisco Simões

 

HAKEREK NO HATÁN

Please enter your comment!
Please enter your name here