Ministru Obras Públika, Salvador Soares dos Reis Pires. Imajen Media MOP

VENILALE, 09 agostu 2019 (TATOLI)-Ministru Obra Públika (MOP), Salvador Eugénio Soares Pires, husu ba abitante Munisípiu Baukau no Vikeke atu asegura kompañia halo konstrusaun no reabilita estrada hodi fó benefísiu ba populasaun kuaze umakain 26.478 iha área ne’e.

“Ha’u husu ba autoridade lokál sira iha Baukau, Venilale no Vikeke inklui populasaun tomak atu apoia no asegura másima ba projetu konstrusaun ne’e”, Ministru Salvador afirma iha ámbitu lansamentu fatuk dahuluk ba konstrusaun estrada Baukau-Vikeke iha postu administrativu Venilale, ohin.

Iha lansamentu ne’e, Ministru Salvadór husu ba abitante sira ne’ebé  afetadu husi konstrusaun ne’e tenke koopera ho kompañia atu halais konstrusaun hodi fó benefísiu ba povu atu asesu bá merkadu no fatin atendimentu públiku sira seluk.

“Tanba prosesu hala’o kleur projetu ne’e iha kompensasaun  ba liberta rai,  ai-horis no  uma sira, ne’ebé povu tenke koopera”, katak.

Tanba ne’e nia adianta,  Sekrétariu Estadu Terras no Propriedades, Jestaun Manajementu Projetu MOP, autoridade lokál no kompañia atu halo kooperasaun ho abitante afetada sira atubele hala’o konstrusaun estrada ho susesu ho kualidade no determina tuir tempu.

Ministru garante hafoin lansamentu ne’e, estrada Baukau-Vikeke sei aselera lalais atu atividade ekonomia Timor-Leste, liuliu hamenus tempu viajen, loke asesu bá merkadu, eskola no sentru saúde sira. Projetu ne’e sei halo estrada seguru no reziliente liután ba afeta mudansa klimátika.

Iha fatin hanesan, Country Director Banku Dezenvolvimentu Aziátiku (ADB, sigla inglés) iha Timor-Leste, Paolo Spantigati, dehan ADB sei kontinua sai parseiru ho Estadu Timor-Leste liuliu iha área dezenvolvimentu infraesturutura.

“Atu hametin konetividade estrada tanba rekoñesidu nu’udar fatór xave hodi kria kampu serbisu, aumenta produtividade agríkola no hamenus ki’ak”, katak.

Prezidente Autoridade Munisipál Baukau, António Guterres, dehan povu Baukau prontu atu apoia no asegura projetu konstrusaun estrada Baukau-vikeke ne’e.

“Ami prontu atu asegura mega projetu ne’e no husu ba inan-aman sira atu kontribui tanba ita mak sei hetan benefísiu ne’e”, nia afirma.

Maibé, nia rekomenda ba Governu atu halo sosializasaun hodi populasaun ne’ebé afetadu husi konstrusaun ne’e bele hetan kompensasaun ba sira-nia ai-horis no rai sira.

Reprezentante Autoridade Munsípiu  Vikeke, Augusto de  Araújo, dehan populasaun Vikeke kontente tebes no prontu apoia no kontribui ba projetu konstrusaun no reabilitasaun  estrada Baukau bá Vikeke ne’e.

“Ami-nia povu hein kleur estrada di’ak, ne’ebé prontu atu apoia no kontribui no husu  ba kompañia atu envolve mós populasaun iha área ne’e hodi hetan servisu”, nia husu.

Projetu estrada trosu ne’e, kilómetru 58 pakote Baukau bá Venilale  kilómetru 23,38  no Venilale bá Vikeke kilómetru 34,62 ho totál orsamentu millaun U$44,  kaer husi kompañia internasionál China Overseas Engineering Group (COVEC) ho durasaun obra to’o 2022.

Orsamentu ne’e empréstimu husi Banku Dezenvolvimentu Aziátiku no konkursu liuhusi Komisaun Nasionál Aprovizionamentu no hetan ona vistu préviu husi Kámara Konta.

Notísia relevante : 9 Agostu, Governu Lansa Fatuk Dahuluk Estrada Baukau-Vikeke

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here