Autoridade Munisípiu Manatuto hamutuk ho veteranu, estudante no povu tomak kari ai-funan ba eroi sira ne'ebé dedika aan ba ukun rasik aan. Imajen/Nelson de Sousa

MANATUTO, 08 agostu 2019 (TATOLI)-Povu Timor-Leste brani no matenek tebes enfrenta intimidasaun psikolójiku no fíziku oioin hosi tropa Indonéziu no aliadu sira pro-integrasaun nian atu  impede povu nia vontade hakat ba urna hodi vota iha loron konsulta popular 30 agostu 1999.

Notísia Relevante : Xanana Husu Ema Hotu Halo Reflesaun

Januário Natalino Soares.

Januário Natalino Soares, nu’udar poling staff UNAMET (The United Nations Mission in East Timor) haktuir katak, momentu ne’ebá difisil tebes. Tanba povu moris iha intimidasaun no presaun boot hodi obriga povu la bele ba vota no karik ba vota mós tenke vota ba opsaun Autonomia la’ós vota ba CNRT (Conselho Nasional Resistensia Timorense) hodi termina nia destinu ukun rasik aan.

Nia dehan, tropa Indonéziu sira uza tátika militár oioin no uza maluk timoroan sira hodi forma grupu milisia  para halo ta’uk  povu to’o povu balun mate. Maibé, hirak ne’ebé moris kontinua hatudu nia brani no neon na’in hodi hakat ba sentru votasaun hili CNRT.

“Ami hotu  no ema hotu ta’uk tanba ami sira UNAMET nia staff sai alvu tropa Indonéziu nian, inklui milisia sira pro-Jakarta. Maibé ho povu nia determinasaun fó korajen ba ami servisu hodi haluha tiha saida mak mate. Ukun rasik aan mak ita timoroan hotu nia alvu,”  haktuir Januário Natalino Soares, ohin, iha Igreja Parókia Santo António Manatuto, hafoin partisipa misa komemorasaun loron konsulta populár ba dala-20 (30 agostu 1999-30 agostu 2019) no Misaun INTERFET nian iha Munisípiu Manatuto.

Veteranu Sebastião Soares alias “Mau Kuri” .

Iha fatin hanesan Veteranu Sebastião Soares alias “Mau Kuri” espresa nia sentimentu kontente ho komemorasaun loron konsulta popular nu’udar momentu importante no lisaun ida ba jerasaun foun sira kona-ba prosesu luta libertasaun.

Membru Parlamentu Nasionál hosi Bankada CNRT, Gabriel Soares hanesan Manatuto-oan ne’ebé marka  prezensa iha komemorasaun ne’e fó sasin katak, momentu sira hanesan ne’e nu’udar konsiderasaun boot hosi Estadu ba povu nia kontribuisaun luta, mezmu iha faze ukun aan ne’e, buat barak presiza hadi’a atu bele tulun povu ida ne’e sai hosi ki’ak no mukit.

“Mezmu ita nia progresu dezenvolvimentu seidauk atinje porsentu 100 tuir espetativa povu nian, maibé ita komesa la’o ona iha dezenvolvimentu nia laran,” hateten Deputadu Gabriel Soares.

Membru PN, Gabriel Soares .

Reprezentante povu iha uma fukun Parlamentu Nasionál ne’e iha esperansa boot ho polítika planu estratéjiku dezenvolvimentu nasionál  no polítika dada kadoras mina nian mai rai maran Timor-Leste hodi tulun povu sai hosi kiak.

Komemorasaun loron konsulta populár iha Munisípiu Manatuto ba loron daruak nian,  prienxe ho atividade misa agradesimentu no kari ai-funan iha Osóariu Manatuto vila hodi fó omenajen ba eroi sira ne’ebé mate defende timoroan hotu nia integridade no auto determinasaun.

Iha  parte lokraik kontinua ho programa kompetisaun  dansa tradisionál hosi suku neen (6) ne’ebé pertense ba Postu Administrativu Manatuto Vila.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here