Prezidente Komisaun Organizadora ba Festa Konsulta Populár, 30 agostu 2019, Kay Rala Xanana Gusmao. Imajen/Antonio Goncalves

MANATUTO, 07 agostu  2019 (TATOLI)-Prezidente Komisaun Organizadora ba selebrasaun  loron konsulta populár  ba dala-20 (30 agostu 1999-30 agostu 2019) no misaun INTERFET, Kay Rala Xanana Gusmão, husu  ba ema hotu atu halo reflesaun ba prosesu funu to’o mai iha referendu hodi lori  timor ba ukun rasik aan.

Liuhosi serimónia festa konsulta popular no misaun INTERFET nian ne’ebé hala’o iha Manatuto, ohin, Administradór Munisípiu Manatuto Fernando de Sousa Junior, haktuir mensajen Komandante  ein-Xefe FALINTIL nian katak, loron referendu ba dala-20 liu ba povu tomak determinadu tebes atu ba tuu iha urna hodi hadau tiha Timor-Leste hosi invazór no okupante sira.

Xanana hateten, komemorasaun  loron istóriku tinan ne’e sei hala’o iha munisipiu 12, inklui Rejiaun Administrativu Espesiál Oe-cussi  Ambeno (RAEOA).

Tuir sekuénsia hosi komisaun organizadora ba komemorasaun loron konsulta populár sei hala’o tuir oráriu ne’ebé iha antes ne’e hahú ona iha Munisípiu Lautem, Baucau, Viqueque no ohin iha Manatuto.

“Momentu komemorasaun ida ne’e,ita hotu halo reflesaun fila-fali kona-ba funu naruk ho susar no terus barak tebes hahú iha loron 7 dezembru 1975  to’o mai iha referendu ba eroi hotu fó aan ba mate hodi hetan auto determinasaun,” tenik Xanana Gusmão iha nia mensajen.

 Iha fatin hanesan prezidente komisaun organizadora Munisípiu Manatuto, Alda da Silva ba Ajénsia Tatoli hatete, komemorasaun loron konsulta populár iha Manatuto, komisaun mobiliza komunidade sira partisipa másimu tebes.

Nia hateten,  komemorasaun ne’e la’ós hala’o iha Manatuto Vila de’it, maibé ba mós postu lima hanesan Laleia, Laclubar, Laclo, Soibada no Barique.

Governu sentrál apoiu orsamentu rihun $28, hosi total ne’e aloka rihun $10 ba postu lima hodi realiza komemorasaun loron konsulta populár  uza ba hala’o programa sira hotu.

Ba komemorasaun loron dahuluk iha Manatuto Vila prienxe ho atividade reflesaun no konsertu múzika husi banda Lahane group.

 Komemorasaun ne’e partisipa mós  hosi Premiadu Novel ba Paz nian, José Ramos-Horta, Vise Prezidente Parlamentu Nasionál, Angelina Sarmento, veteranu, autoridade sira hotu iha Manatuto ho mós estudante no juventude sira Manatuto oan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here