Ministru Longuinhos dos Santos. Foto TATOLI: Egas Cristóvão

Dili, 15 jullu 2019 (TATOLI)-Governu sei konstrui Sidade Universitária iha Munisípiu Aileu tuir programa Oitavu Governu Konstitusionál nian, iha 2020.

Ministru Ensinu Superiór Siénsia Kultura (MESSK), Longuinhos dos Santos hateten, polítika VIII governu nian atu loke sidade Universitária iha Aileu atu dezentraliza ensinu superiór sira “Ita hatene kada tinan rekrutamentu Universidae Nasionál Timor-Leste (UNTL) ninia númeru aas demais. Governu hakarak investe iha edukasaun para minimiza númeru ne’ebé aas tan ne’e MESSK hamosu planu ida ne’e,” informa Ministru Longinhos dos Santos, iha komemorasaun aniversáriu ba dala V Komisaun Funsaun Publika (KFP) nian, iha Salaun Igreja Motael, segunda (15/07/2019).

.Ministru Longuinhos dehan, sidade universitária sei harii ho intensaun atu minimiza movimentasaun ensinu superiór nian atu hadau malu iha kapitál Dili tanba de’it hakarak kontinua ba universidade. Maibé, VIII governu hakarak apoiu joven sira iha ensinu sekundária atu konsentra de’it ba sidade universitária ne’ebé sei realiza iha 2020, tinan oin.

“Ita hakarak sira atu estuda ho di´ak liután inklui atu fó mós biban ba sidade kapitál Dili atu bele alkansa ninia dezenvolvimentu ekonomia ho di´ak liután,” tenik  governante ne´e.

Nia hatutan, planu ida ne’e, MESSK hamutuk ho Ministériu Obras Públika (MOP) mak responsalblidade. Tan ne’e, Membru governu ne´e afirma katak sei iha hela faze kontaktu nia laran para nune’e bele hetan ona peritus ida lalais liu tan atu bele alkansa estudu viablidade ba fatin sira ne’ebé atu harii konstrusaun. Maibé prosesu dahuluk MESSK halo ona mak hasoru malu ona ho komunidade no autoridade Munisípiu Aileu nian. “Sira kontente tebes kuandu ami hato’o planu ida ne’e no sira hein bele realiza lalais liután para bele tulun sira labele gastu maka´as liu ba edukasaun”.

Ministru ne’e realsa liutan katak planu sira ne’e atu realiza ho di´ak liu entaun tenke kompleta faze importante sira molok tama ba faze konstrusaun. Tanba ne’e mak MESSK hein hela faze estudu viablidade konkursu Internasionál hodi hakat ba preparasaun dezeñu, ikus mai hodi aselara konstrusaun ne’e rasik.

Kriasaun sidade universitária iha Munisípiu Aileu nu´udar komprimísiu Oitavu Governu Konstitusionál nian ne´ebé deskreve mós iha programa governu nian iha pájina 22, nú. 2.1.7 (Ensinu superiór), alinea da-ne´en. Katak, hahú pasu dahuluk ba kriasaun sidade universitária, iha Munisípiu Aileu.

Notísia relevante: http://www.tatoli.tl/2019/07/governu-kontinua-halo-estudu-no-planu-ba-konsentrasaun-harii-sidade-universitaria-iha-aileu/

Jornalista          : Tomé Amado

Editór               : Rafy Belo

HAKEREK NO HATÁN

Please enter your comment!
Please enter your name here