Xefe Estadu Maiór Jenerál F-FDTL, Lere Anan Timur hala’o enkontru semanál ho Prezidente Repúblika, Francisco Guterres Lú Olo, foin lalais ne’e. Imajen Tatoli/António Gonçalves

DILI, 7 agostu 2019 (TATOLI ) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur, informa F-FDTL prontu asegura bainaka internasionál sira ne’ebé sei partisipa iha komemorasaun loron Konsulta Populár iha 30 agostu.

Nia hato’o ba jornalista sira hafoin atualiza servisu ba Prezidente Repúblika (PR), Francisco Guterres Lú Olo iha Palásiu Prezidensiál, Bairro Pité, kuarta ne’e.

Notísia Relevante: F-FDTL ho PNTL Asegura Festa Konsulta Populár

Lere haktuir, iha enkontru ne’e, Xefe Estadu husu kona-ba atividade saida de’it mak Forsa Armada sira sei halo hodi bele simu bainaka rai li’ur sira, nune’e nia relata F-FDTL sira sei hamutuk ho Polísia Nasionál Timor-Leste (PNTL) sira hodi asegura loron istóriku ne’e, liliu fó seguransa liu-ba Xefe Estadu no sira nia espoza.

Maski seidauk hatene loloos Xefe Estadu husi nasaun ne’ebé de’it mak atu partisipa, maibé Lere informa oras ne’e Forsa Armada sira hahú treinu hodi koloka pesoál sira ne’ebé atu akompaña bainaka sira.

“Buat   hirak   ne’e   hotu   kestaun   protokolár,   tanba   ita   Timor   ne’e protokolu fraku hela, nune’e ita hahú prepara atu labele falla”, nia dehan.

Lere la sita númeru pesoál seguransa hira mak sei koloka atu asegura loron Konsulta Populár, maibé nia garante seguransa ne’e sei la’o ho di’ak.

Antes ne’e, F-FDTL no PNTL inklui liña ministeriál sira hala’o ona enkontru koordenasaun ho Komisaun Organizadora ba festa Konsulta Populár.

Jornalista:   Cipriano   Colo

Editór: Xisto Freitas

HAKEREK NO HATÁN

Please enter your comment!
Please enter your name here