Xefe Estadu Maiór Jenerál FALINTIL-FDTL, Majór Jenerál Lere Anan Timur ho Komandante Jerál PNTL Komisáriu Polísia Faustino da Costa, esplika preparasaun forsa rua ba asegura festa konsulta populár, 30 agusto 2019. Imajen/Eugénio Pereira

DILI, 05 agostu (TATOLI)-Komandu FALINTIL-Forsa Defeza Timor-Leste (F-FDTL) ho Polisia Nasionál Timor-Leste (PNTL) koloka ona membru sira fó seguransa  ba festa konsulta populár ba dala-20 (30 agostu 1999-30 agostu 2019) no prezensa Forsa INTERFET iha Timor-Leste.

Komandu PNTL no F-FDTL koloka ona membru sira hala’o servisu iha Munisípiu 12 inklui Rejiaun Administrativu Espesiál Oe-Cusse Ambeno (RAEOA).

Xefe Estadu Maiór Jenerál FALINTIL-FDTL, Majór Jenerál Lere Anan Timur, apela ba povu Timor-Leste atu selebra loron istóriku ne’e ho dame hodi hatudu ba mundu katak, Timor-Leste agradese ba nasaun hotu- hotu nia apoiu ba independénsia no agora Timoroan sira unidade nafatin hodi hakat ba dezenvolvimentu.

“Ita tenke hatudu orgullu dala ida tan. Ha’u fiar katak 30  agostu no 20 setembru sei hakmatek,” afirma Lere Anan Timur, ohin, liuhosi konferénsia imprensa konjunta F-FDTL ho PNTL iha Kuartél Jerál PNTL, Caicoli, Dili.

Lere apela ba entidade hothotu no juventude sira atu koopera ho autoridade sira, hodi asegura Timor nia prestíjiu iha mundu nia futar matan.

Iha  fatin hanesan, Komandante Jerál PNTL Komisáriu Polísia Faustino da Costa, apresia kooperasaun F-FDTL no PNTL hodi asegura seguransa ba povu inklui simu bainaka xefe estadu no xefe governu sira rai li’ur vizita mai Timor-Leste.

“Komandu rua mós preparadu ona hodi fó seguransa ba loron importante rua ne’e, inklui garantia seguransa too ba munisípiu no suku sira hotu,” Faustino da Costa hateten.

Komisáriu Faustino husu atu timoroan sira kontinua unidade hanesan tempu funu timoroan hamutuk lori Timor ba ukun aan no agora timoroan tenke unidade nafatin hodi lori Timór sai husi situasaun frajil kontribui ba ekonomia no dezenvolvimentu Timor-Leste.

Komandu PNTL-F-FDTL inklui liña ministeriál sira rasik hala’o tiha ona enkontru koordenasaun ho Komisaun Organizadora ba festa Konsulta Populár ne’ebé lidera hosi Komandante ein-Xefe FALINTIL, Kay Rala Xanana Gusmão.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here