Tenente Koronél Martín Dransfield, nu’udar Militár Forsa Nova Zelándia. Imajen/Eugénio Pereira

DILI, 07 agostu 2019 (TATOLI)-Tenente Koronél  Forsa Defeza Nova Zelándia reprezenta mós Forsa Defeza Austrália (‎NZDF- ADF), Martín Dransfield, konsidera membru observadór Militár FALINTIL-Forsa Defeza Timor-Leste (F-FDTL) ba Organizasaun Nasoins Unidas  (ONU) iha ona kapasidade sufisiente hodi bele hala’o misaun manutensaun ba pás nian iha mundu.

Notísia Relevante : Observadór Militár F-FDTL Ba ONU Hala’o Peskiza Ba Problema Sosiál iha Camea

Martín dehan, Forsa Nova Zelándia no Austrália apresia tebes durante ne’e koopera ho Komandu F-FDTL estabelese Sentru Treinamentu Peace Keeping ONU iha Metinaro no fó treinamentu área militár nian para prepara forsa sira atu hala’o misaun iha ONU.

“Nova Zelándia no Austrália kontente tanba bele apoiu membru F-FDTL na’in sia (9) Nova Zelándia ida (1) no Austrália rua (2) sira atu treinu hola parte iha misaun dame iha ONU,”  hateten Tenente Koronél Martín, ohin, ba jornalista sira iha Suku Camea, Postu Administrativu Cristo Rei, Munisípiu Dili.

Tenente Koronél Martín hatutan, iha kursu semana tolu ne’ebé sira fahe ba Membru Observadór Militár Nasoins Unidas   aprende uluk matéria no teoria revizaun ba servisu militár nian hodi uza ekipamentu modernu hanesan, rádiu komunikasaun no fasilidade militár nian importante sira inklui, fó asisténsia saúde no atende problema ruma kona-ba asidente tráfegu ka insidente seguransa no seluk tan.

Alende ida ne’e, membru forsa sira aprende halo patrullamentu oinsá hala’o reuniaun ho autoridade suku hodi buka akalma situasaun konflitu iha bairru sira ne’ebé mosu problema krime no violénsia bele iha hetan dame.

Treinamentu ne’ebé hala’o koopera mós ho Organizasaun Mundiál ba Ai-han (WFP) hodi suporta militár sira bainhira hala’o tiha enkontru hodi rekolla dadus problema ne’ebé povu sira enfrenta, WFP bele fó suporta hodi koopera ho Governu Timor-Leste.

Tenente Koronél Martín nu’udar Militár Forsa Nova Zelándia ne’ebé uluk hala’o mós misaun manutensaun pás ONU  nian iha Munisípiu Covalima iha tinan 2000.

“Ha’u kontente agora mai fali Timór hodi kontinua fó suporta ba F-FDTL atu sai forsa profisionál,” tenik nia.

Durante hala’o misaun iha Covalima, Martín nu’udar Xefe Ligasaun Militár ONU halo ligasaun ho Komandu FALINTIL hodi buka hametin dame iha Covalima.

Nia hatutan, uluk forsa Nova Zelándia nia membru na’in lima mak mate iha Timór, tanba ne’e Governu Nova Zelándia haree katak, presiza Forsa Nova Zelándia atu fó apoiu nafatin ba F-FDTL nu’udar parte ida husi kooperasaun defeza no seguransa nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here