Membru Observadór Militár FALINTIL-Forsa Defeza Timor-Leste (F-FDTL) ba Organizasaun Nasoins Unidas (ONU) hamutuk ho Forsa Defeza Austrália no Forsa Defeza Nova Zelándia (ADF-‎NZDF) hala’o enkontru ho Autoridade Suku Camea, Postu Administrativu Cristo Rei no Munisípiu Dili. Imajen/Eugénio Pereira

DILI, 07 agostu 2019 (TATOLI)-Membru Observadór Militár FALINTIL-Forsa Defeza Timor-Leste (F-FDTL) ba Organizasaun Nasoins Unidas  (ONU) hamutuk ho Forsa Defeza Austrália no Forsa Defeza Nova Zelándia (ADF-‎NZDF) hala’o vizita no peskiza ba problema sosiál ne’ebé komunidade Suku Camea, Postu Administrativu Cristo Rei, Munisípiu Dili, enfrenta durante ne’e.

Observadór Militár F-FDTL ba ONU, Kapitaun F-FDTL, Francisco Silva. Imajen/Eugénio Pereira

Iha vizita ne’e, Observadór Militár F-FDTL-ONU ne’ebé lidera hosi Kapitaun F-FDTL, Francisco Silva, hala’o enkontru ho xefe suku ho xefe aldeia sira hodi introdús uluk misaun servisu membru F-FDTL ne’ebé hahú hala’o treinamentu iha Sentru Treinamentu Peace Keeping ONU iha Metinaro hodi prepara membru F-FDTL sira hola parte misaun manutensaun ba pás ONU  nian.

Hafoin tuir treinamentu semana rua sira, membru F-FDTL halo vizita peskiza ba reuniaun ho autoridade Suku Comoro, Madohi, Bebonuk, Manleuan, Bairru Pité, no Camea-Bocora, hodi rekolla dadus ne’ebé liga problema seguransa, bee moos, asesu ba saúde, edukasaun seguransa ba ai-han inklui ekonomia moris kada uma kain.

Kapitaun Francisco hateten, ho vizita ne’e sira bele aumenta sira koñesimentu liu-liu foti dadus ba problema ne’ebé povu enfrenta bele hato’o ba Organizasaun Mundiál ba Ai-han (WFP) bele tau matan.

“Vizita ida ne’e faze pratika  ba ami, oinsá karik hala’o misaun iha ONU nu’udar observadór militár ba ONU bainhira ba foti dadus kona-ba problema moris no difikuldade ne’ebé povu sira enfrenta, sei hato’o fali ba iha lideransa ONU ka organizasaun ONU nian sira bele tau matan,” dehan Silva, ohin, ba jornalista iha Sede Suku Camea, Dili.

Misaun servisu ne’ebé agora F-FDTL ba ONU hala’o hanesan mós misaun ne’ebé uluk forsa Austrália, Nova Zelándia, Portugál, Itália no rai seluk mai hala’o iha TL dezde 1999 too 2002.

Tuir nia, liuhosi treinamentu ne’e, sira bele prepara aan ona, karik ba oin, hala’o misaun iha ONU.

Nia garante katak,  sira iha ona esperiénsia sufisiente hodi halo adaptasaun ba moris tuir sitasaun moris ne’ebé diferente iha nasaun sira ne’ebé presiza ONU nia apoiu atu hetan dame no rezolve krize polítika no militár.

Iha fatin hanesan, Xefe Suku Camea, Matos da Costa, apresia ohin loron Estadu TL nian forsa F-FDTL bele hola parte iha misaun ONU tun ba halo peskiza hodi rekolla dadus ba problema sosiál sira ne’ebé povu enfrenta.

“Ami agradese bele fahe dadus ba ita nia forsa sira, liu-liu liga ho problema sosiál ne’ebé povu enfrenta,” dehan autoridade suku ne’e.

Nia observa katak, membru F-FDTL sira iha ona kbiit no kapasidade di’ak para bele hola parte iha misaun ONU nian.

Suku Camea kompostu husi Aldeia 13 ho totál povu tuir sensu 2015 hamutuk rihun 13 liu, ho difikuldade falta asesu ba bee moos, liuliu aldeia rua ne’ebé lokaliza iha foho leten Camea-Becora.

“Povu Aldeia rua ne’e mak enfrenta problema bee moos, tanba sira hela iha foho leten tenke mai kuru bee moos iha Camea okos,” nia hatete.

Xefe Suku ne’e fiar ba oin, membru F-FDTL sira ne’ebé hala’o misaun iha ONU sei sai forsa ida profisionál liután no aban bainrua sira remata misaun dame iha ONU fila mai sei fó kontribuisaun boot liu ba prosesu dezenvolvimentu iha instituisaun F-FDTL.

Jornalista : Eugénio Pereira

Editór : Francisco Simões

HAKEREK NO HATÁN

Please enter your comment!
Please enter your name here