Diretór DNTT, Natalino de Rosario. Imajen Egas Cristovão.

DILI, 07 agostu 2019 (TATOLI)-Diretór Nasionál Transporte no Terrestre (DNTT) Ministériu Transporte no Komunikasaun (MTK), Natalino do Rosário, promete sei hadi’a servisu relasiona ba kestaun inspesaun viatura, nune’e bá oin labele repete fali deskonfiansa ne’ebé liga ba irregularidade balun ne’ebé akontese iha DNTT.

Nia dehan iha inspesaun ne’ebé maka hala’o husi Ministru Transporte no Komunikasaun, José Agostinho da Silva, foin daudaun iha DNTT Komoro hatudu katak mosu buat balun ne’ebé ladún loos iha servisu DNTT Komoro ne’ebé liga ba servisu inspesaun ba karreta no motór sira liuliu ba dokumentu sira hanesan karreta balun la bá halo inspesaun, maibé sira hetan dokumentu.

Tanba ne’e, bá oin DNTT planeia hodi servisu hamutuk ho Polísia Tránzitu Nasionál halo opresaun la’o ain hodi kontrola karreta no motór sira. Motivu husi opresaun movel ne’e atu haree didi’ak karreta sira nian kondisaun no dokumentu inspesaun.

“Se karreta ne’e kondisaun aat maka nia iha dokumentu inspesaun (KIR) moris hela, entaun ne’e buat ruma la’o laloos”, dehan nia ba jornalista TATOLI iha nian kna’ar fatin Balidi, ohin.

Tanba ne’e, DNTT sei koordena ho Polísia nune’e haree ba kestaun sira ne’e hodi bele hadi’ak liután servisu DNTT iha futuru.

“Husi Diresaun Nasionál Transporte Terrestre (DNTT), ami halo kontaktu ona ho Polísia Tránzitu Nasionál hodi servisu hamutuk halo opresaun konjunta movel, nune’e haree karreta no motór hodi identifika sira ne’ebé kondisaun ladi’ak haruka para”.

Iha sesta semana kotuk (02/08), Ministru José Agostinho da Silva, halo inspesaun iha DNTT Komoro no konsege deteta iha irregularidade ne’ebé liga ba atendimentu karta inspesaun ba karreta.

Ministru esplika iha inspesaun ne’e deskonfia funsionáriu balun hosi aprovizionamentu DNTT rasik maka fasilita kondutór sira hosi transporte públiku atu halo operasaun maski sira laiha karta kondusaun.

Tanba ne’e, ministru orienta ona ba parte inspetór sira iha ministériu atu halo investigasaun.

Notísia relevante : MTK Inspesiona DNTT Comoro Mosu Irregularidade

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here