Ministru Transporte no Komunikasaun, José Agostinho da Silva. Imajen/Egas Cristovão

DILI, 02 agostu 2019 (TATOLI)-Ministru Transporte no Komunikasaun (MTK), José Agostinho da Silva, halo inspesaun iha Diresaun Nasionál Transporte Terrestre (DNTT) Comoro, ohin, konsege deteta iha irrregularidade ne’ebé liga ba atendimentu karta inspesaun ba karreta.

Ministru esplika iha inspesaun ne’e deskonfia funsionáriu balun hosi aprovizionamentu DNTT rasik maka fasilita kondutór sira hosi transporte públiku atu halo operasaun maski sira laiha karta kondusaun.

Tanba ne’e, ministru orienta ona ba parte inspetór sira iha ministériu atu halo investigasaun.

“Ha’u fó ona instrusaun ba inspetór jerál ministériu nian atu investiga asuntu halo “Sim” ho “Plat”, Ministru MTK ba jornalista sira hafoin halo inspesaun iha DNTT, ohin.

“Ita sei investiga parte aprovizionamentu DNTT nian, hahú husi asesór, diretora aprovizionamentu ho nia funsionáriu sira atu ita haree, investigasaun ne’e sei haree hosi prosesu inísiu to’o remata ho maneira fazeada”, nia adianta.

Iha fatin hanesan, Diretór Nasionál Transporte no Terrestre, Natalino do Rosário, rekoñese katak durante ne’e akontese duni irregularidade ba prosesu atendimentu dokumentu karreta nian.

“Sim, durante ne’e iha duni irregularidade, hanesan ministru ko’alia tiha ona”, katak.

Dirijente DNTT subliña iha karreta balun halo operasaun ho kondisaun aat, hanesan balun lampu la lakan, maibé iha inspesaun moris hela, ida ne’e maka ema preokupa.

Tanba ne’e, nia halo ona kontaktu ba komandante polísia tránzitu nasionál, atu iha tempu badak nia laran sei halo auto stop hamutuk.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here