Sekretáriu Ezekutivu Komisaun Nasionál Kombate HIV/SIDA, Daniel Marçal. Imajen Antonio Goncalves

DILI, 06 agostu 2019 (TATOLI)-Komisaun Nasionál ba Kombate VIH/SIDA (CNCS-sigla portugés) sujere inan-aman sira atu akompaña intensiva oan sira no mós entidade relijioza sira atu tau-matan ba morál joven sira hodi evita hahalok soe bebé.

Sekretáriu Ezekutivu Komisaun Nasionál Kombate VIH/SIDA, Daniel Marçal konsidera katak ema ne’ebé soe bebé tanba inan-aman la fó atensaun másima ba oan sira no husik oan sira ransu livre hodi ikus mai akontese soe bebé lemo-lemo iha sidade Dili.

“Ikus-ikus ne’e maioria joven sira  barak mak soe bebé lemo-lemo iha sidade Dili la iha responsabilidade,” hateten Sekretáriu Ezekutivu, Daniel Marçal ba jornalista iha nia kna’ar fatin, Praia dos Coqueiros, Dili, tersa (06/08/2019).

Nia haktuir, uluk ema barak akompaña Komisaun Nasionál Kombate HIV (Human Immunodeficiency Virus)/SIDA (Síndrome  de Inmunodeficiencia  Adquirida) halo sensibilizasaun) ba joven sira husi munisípiu to’o kapitál Dili.

“Kuandu ita ko’alia kona-ba moras HIV/SIDA ida ne’e maibé ema balun kestiona katak ida ne’e direitu, mas agora haree to’ok saida mak akontese, soe bebé lemo-lemo la to’o semana, loron de’it rona ema soe bebé”.

Nia dehan, haree iha jornál, haree televizaun, rona novidade kona-ba ema soe bebé, nia foti konkluzaun rua; primeiru mak lori mensajen ida ba inan-aman sira oinsá atu tau atensaun ka envolvimentu no akompañamentu ba oan sira no segundu mak mensajen ba igreja, relijiozu sira ne’ebé responsável ba morál ba joven sira-nia hanoin bainhira soe bebé.

“Ita ko’alia kona-ba soe bebé ne’e krime ona maibé oinsá mak ita atu prevene, bainhira ita prevene ona ema la bele soe bebé ne’e mak komisaun fó sensibilizasaun, fahe informasaun ba joven sira mak labele ransu livre no seksu livre arbiru,” nia dehan.

Tanba ne´e, Sekretáriu Ezekutivu, Daniel Marçal hato´o mensajen ba inan-aman sira atu halo akompañamentu intensivu; morál ida hanesan inan-aman  ba oan sira, atu nune’e oan ne’e rona hodi hakmatek iha uma.

Nune´e mós, nia sujere ba governu atu presiza implementa lei ida hodi regula fatin públiku sira hanesan Largo Lecidere, Jardim 5 de Maio, Jardin Motael no tasi ibun sira. “Tenke tau regula tanba ne´e importante”.

Segundu, tuir nia, governu tenke tau regulamentu ba kós sira; karik bele feto hela ketak, mane hela ketak.Terseiru, governu tenke bandu ona ótel sira ne’ebé iha sidade Dili, uza oras ida oras rua sira ne’e.

“Ema ne’ebé presiza otel oras ida, oras rua ne’e iha aeroportu ne’ebá, tanba hein aviaun tarde mak ema deskansa iha ne’ebá, loke otel oras ida oras rua  halo saida ne’e, fo oportunidade ba joven feto no joven mane sira, tanba ne’e mak governu sira tenke regula ida ne’e,” tenik sekretáriu ezekutivu ne´e.

Alende, Sekretáriu Ezekutivu, Daniel Marçal husu mós autoridade sira katak tenke tau atensaun liuliu xefe suku, sefe aldeia sira,kós sira ne´e di´ak ka lae. “ Ami la fó sala xefe suku, xefe aldeia mas tenke hatene nia ema sira iha suku laran ne’e,” nia hateten.

Notísia relevante:Soe Bebé, La Refleta Kultura TL

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here