DILI, 05 agostu (TATOLI)-Komandante Jerál Polisia Nasionál Timor-Leste (PNTL), Komisáriu Polísia Faustino da Costa dehan, polisia sei kontinua investiga nafatin kazu ema soe bebé ne’ebé akontese makas iha Dili.
Komandante Faustino dehan, bainhira ema ida soe ka oho bebé inosente ne’e krime no la refleta ba kultura Timor-Leste nian.
“Ikus-ikus ne’e ita nia inan sira komesa soe bebé iha fatin públiku, bebé balun konsege salva no bebé balun la konsege salva. Aproveita oportunidade hato’o ba inan no aman sira, joven feto-mane hahalok soe bebé, oho bebé, hahalok ida ne’e la refleta ba kultura Timor-Leste nian,” afirma Komisáriu Faustino da Costa, ohin, ba jornalista liuhosi konferénsia imprensa konjunta iha Kuartél Jerál PNTL, Caicoli, Dili.
Nia dehan, kazu soo bebé sira ne’ebé akontese liu ona, PNTL sei nafatin esforsu buka tuir no investiga autór sira hodi responsabiliza ba krime, hodi bele hakotu problema ne’e labele akontese tan iha Timor-Leste.
Lori Komandu PNTL nia naran, apela mós ba inan aman sira atu eduka oan sira moris tuir regra no morál ne’ebé fó valór pozitivu ba oan sira nia futuru hodi evita ransu livre.
Komisáriu ne’e hatutan, kazu soe bebé sai nu’udar problema boot ba sosiedade Timor-Leste presiza koopera hamutuk hodi sosializa programa edukasaun boot liu iha sosiedade nia moris.
Jornalista : Eugénio Pereira
Editór : Francisco Simões
