Deputada bankada FRETILIN, Angêlica Rangel. Imajen António Goncalves

DILI, 6 agostu 2019 (TATOLI) – Deputada Bankada FRETILIN, Maria Angélica Rangel, konsidera Lei Atividade Petrolíferu (LAP) ne’ebé sofre ona alterasaun dala-rua, la-tuir kritériu tanba halo alterasaun iha lejizlatura ida nia laran.

“Signifika tinan ida labele halo alterasaun ba dala-rua, tanba ne’e mak ami dehan la-priénxe kritériu formál no legál, ne’e hakerek iha Rejimentu Parlamentu Nasionál artigu 92 alínea 2. Artigu ne’e dehan labele altera lei ida dala-rua iha lejizlativa ida”, tenik Maria Angélica.

Nia dehan tan, LAP ne’e alterasaun dahuluk iha setembru 2018 no alterasaun daruak iha semana rua liu-ba, nune’e akontese iha lejizlatura ida de’it (V lejizlatura).

Notísia Relevante: PN Aprova Ona Proposta Lei Haat iha Finál Globál

PN Réapresia Ona Alterasaun LAP Ho Votu Maioria

Iha fatin hanesan, Deputadu FRETILIN, Joaquim dos Santos, hateten lei ne’ebé iha ona presiza implementa iha tempu naruk lai mak foin bele altera.

“Uluk sira la haree hetan problema, ohin loron halo alterasaun. Tinan ida ita labele altera lei ne’e dala-rua. Ita labele hanoin ohin halo alterasaun, aban sobu hafoin monta fali. Ne’e viola prinsípiu lejizlasaun komún nian”, hateten deputadu ne’e.

Entretantu, Parlamentu Nasionál (PN) halo alterasaun dahuluk ba LAP atu ajusta ho kompra partisipasaun konsórsiu Greater Sunrise, nune’e bele fasilita Governu fásil liu halo operasaun iha atividade petrolíferu.

Enkuantu, alterasaun daruak ba LAP, hanesan pakote lejizlativa ida atu priénxe rekizitu hodi Ratifika Tratadu Fronteira Marítima Timor-Leste no Austrália.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here