Konsertu Múzika hodi komemmora loron Konsulta Populár iha Munisípiu Baucau. Imajen/Nelson de Sousa

BAUCAU, 04 agostu 2019 (TATOLI)-Grupu múzika Lahane ne’ebé famozu ho knananuk “Oras To’o Ona” iha ámbitu kampaña Referendu (Konsulta popular) iha tinan 1999, Sábadu kalan ( 03/08/2019), afirma fila-fali kántiku ne’e iha konsertu selebrasaun loron konsulta popular ba dala-20 (30 agostu 1999-30 agostu 2019) no prezensa misaun INTERFET (International Force East Timor) iha Timor-Leste.

Notísia Relevante : Baucau Komemora Loron Konsulta Populár

Konsertu Múzika iha Baucau hodi komemora loron konsulta populár ba dala-20 (30 agostu 1999-30 agostu 2019). Imajen/Nelson de Sousa

Kompozisaun banda múzika Lahane Group  ne’ebé maioria hosi família Smith; Zeca Smith, Manuel Smith, Alex Smith, Alo Smith, Jorge Smith, Pedro Madeira, Zeca Estaquio ho sira seluk tan, lori kántiku ne’e ho mensajen atu fó hanoin hikas ba povu Baucau kona-ba sofrimentu no sakrifisiu hotu ne’ebé povu Timor-Leste enfrenta iha ninia peregrinasaun luta hosi 1975-1999 Referendu.

Bainhira Smit Cs iha palku leten toka ho ritmu múzika “Oras To’o Ona”, povu Baucau ne’ebé hamriik iha palku okos no sorin-sorin haklalak ho kontente no balun ho matan-ben hodi lembra múzika ne’e iha tempu susar nia laran atu ba ezerse nia direitu demokrátiku hodi kontra opsaun Autonomia no afirma destinu “Ukun Rasik Aan”.

“Múzika sira ne’e ho sentidu alerta ba ema hotu iha momentu pasadu hatudu katak maske iha situasaun difisil, maibé aten brani nafatin,” hateten Zeca Smith hodi hanoin hikas momentu difisil iha 1999 hodi husu mós jerasaun foun sira hosi tinan 1999 mai atu buka hatene istória luta to’o mai referendu.

Kalan konsertu ne’e aprezenta mós kantor solo famozu sira seluk, hanesan Quito Belo, Leo Moniz, ho Sico Ramelau, inklui Banda Múzika Trio Kuluguisa.

Povu Baucau sente animadu tebes tanba banda múzika sira, inklui artista solo  sira, lori múzika ne’ebé nakonu ho sentidu rezisténsia hodi hafanu fali Baucau oan sira nia sentidu patriotizmu no nasionalizmu.

Múzika hirak ne’ebé iha sentidu mensajen, hanesan “Mate Mohu”, “Loron Aban Hahú Ohin”, “Oras To’o Ona” no seluk tan lori povu Baucau ba hanoin hikas tempu susar no matan been nia laran.

Marcelino da Costa, nu’udar juventude Baucau oan kontente ho konsertu ida ne’e, tanba konsertu ne’e nia sentidu lori mensajen pás, unidade no fortaleza hikas povu no juventude nia sentidu nasionalizmu no patriotizmu.

Konsertu ne’e la’o ho susesu no hakmatek tanba hetan kolaborasaun di’ak tebes hosi komunidade no juventude Baucau no apoiu seguransa hosi komandu Polísia Nasionál Timor-Leste (PNTL) Munisípiu Baucau.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here