Prezidente Autoridade Munisípiu Baucau, António Augusto Guterres. Imajen/Nelson de Sousa

BAUCAU, 02 agostu 2019 (TATOLI)-Governu sentrál liuhosi komisaun organizadora festa tinan 20 loron konsulta populár (30 agostu 1999-30 agostu 2019), ohin, ofisializa komemorasaun loron istóriku ne’e ho povu Munisípiu Baucau tema ‘Dias cinzas a reconciliação, restauração e desenvolvimento nasionál’.

Festa popular ne’ebé kontribui ba auto determinasaun povu Timor-Leste nian ne’e hala’o iha Baucau durante loron rua, hahú hosi sesta ohin to’o sabadu aban (02-03/08/2019).

Reprezentante Ministru Interinu Administrasaun Estatál (MAE), Germano Sauta Brites Dias,  hatete, komemorasaun ne’e sei hala’o iha munisípiu hotu, maibé ohin hala’o iha Baucau hodi komemora loron konsulta popular no prezensa forsa internasionál, The International Force in East Timor (INTERFET).

Nia dehan, atu fó susesu ba eventu ne’e, ema hotu tenke fó kontribuisaun, kolaborasaun no koordenasaun ba malu.

“Ha’u ofisiálmente abertura komemorasaun  ida ne’e iha Baucau,” afirma reprezentante Governu sentrál ne’e hodi ofisializa eventu ne’e iha Baucau.

Prezidente Autoridade Munisípiu Baucau, António Augusto Guterres, hatete, komemorasaun ne’e hodi reflete ba akontesimentu istóriku sira  liuliu prosesu luta ba libertasaun nasionál, hahú kedas tinan  1975 to’o 1999.

Governu sentrál fó apoiu orsamentu rihun $28 ba autoridade Munisípiu hodi ezekuta ba atividade hodi komemora loron nasionál ne’e.

Hosi Total rihun $28 ne’e, aloka rihun $10 ba Postu Administrativu neen kompostu hosi Postu Administrativu Baguia, Baucau Villa, Laga, Quilicai, Vemasse no Venilale. Enkuantu rihun $18 aloka ba administrasaun Munisípiu Baucau hodi apoiu atividade no programa ba komemorasaun ne’e rasik.

“Osan ne’e hodi hala’o  atividade ba programa hanesan kompetisaun pintura, poezia no seluk tan iha fulan jullu liu ba iha postu administrativu sira ne’e,” informa António Augusto Guterres.

Ba atividade, ohin nian,  prienxe ho reflesaun, kompetisaun dansa tradisionál hosi postu administrativu neen iha Baucau no aban, kontinua ho kompetisaun halai karon, sa’e bua, misa agradesimentu, konsertu muzikál no kari ai-funan  ba eroi sira iha osóariu Fatumaca.

Komemorasaun ne’e hetan partisipasaun másimu hosi  povu no lao di’ak tanba hetan kooperasaun  seguransa hosi Polisia Nasionál Timor-Leste  (PNTL) no FALINTIL-Forsa Defeza Timor Leste (F-FDTL).

Komemorasaun hanesan antes ne’e hala’o ona iha Munisípiu Lautem iha loron 31 jullu  to’o loron 01  agostu 2019.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here