Prezidente Juri Ba Kompetisaun Grupu Korál Múzika Rezisténsia, Pe. Adérito Manuel Euclides Victor da Costa, SDB. Foto: FB Amo Aderito Costa

DILI, 03 agostu 2019 (TATOLI)—Prezidente Juri Ba Kompetisaun Grupu Korál Múzika Rezisténsia, Pe. Adérito Manuel Euclides Victor da Costa, SDB, hateten inisiativa Centro Nacional Chega! (CNC) halo kompetisaun ida ne’e (Grupu Korál Múzika Rezisténsia) atu bele hamoris fila fali patriotizmu no nasionalizmu ba múzika rezisténsia liuhusi aranjementu korál.

Tanba, iha pasadu múzika sira ne’e hotu kanta solo de’it ho banda, entaun agora ita tau ba formatu koru ho nia objetivu atu koru ne’ebé kanta iha lian haat no halo aranjementu ba lian haat (bass, bareto, tenor, sopran no alto) ba múzika sira ne’e hotu.

“Ha’u hakarak hatete, kompetisaun ida ne’e atu bele hamoris fila fali patriotizmu no nasionalizmu ba múzika rezisténisa liuhusi aranjementu korál. Tanba múzika sira ne’e hotu kanta solo de’it ho banda. Agora ita tau ba formatu koru ho nia objetivu atu koru ne’ebé kanta iha lian haat (bass, tenor, sopran no alto),” dehan Prezidente Juri Ba Kompetisaun Grupu Korál Múzika Rezisténsia, Pe. Adérito Manuel Euclides Victor da Costa, SDB, ba Ajénsia TATOLI liuhusi entrevista antes kompetisaun ne’e hahú iha Salaun Centro Covenção Dili (CCD), Merkadu Lama, Dili, sábadu (3/8/2019).

Segundu, nia hatutan, sira organiza liuhusi kompetisaun ne’ebé kompetitór hamutuk grupu korál 12 ne’ebé loke ba munisípiu hotu maibé só Munisípiu Aileu de’it mak partisipa. Entaun, iha grupu 12 ne’e tanba iha razaun ruma sira fahe ba grupu tolu maka Grupu A kompostu husi grupu tolu (3/8/2019), grupu B fahe ba grupu lima (4/8/2019) no grupu C fahe ba grupu haat (5/8/2019).

Entaun, nia esplika, husi grupu tolu ne’e ekipa juri sei halo no anunsia eliminasaun iha grupu C nia aprezentasaun iha loron ikus iha segunda (5/8/2019). Husi grupu 12 ne’e, grupu haat (4) mak ita elimina no hela grupu ualu (8) mak ba tama iha semi finál. Iha semi-finál, ita sei elimina tolu (3) entaun grupu lima (5) mak sei tama ba faze finál.

“Objetivu ida tan mak iha komptisaun finál, sé mak manan, sira sei manan prémiu boot ida mak manan-na’in sei ba hananu iha 30 Agostu ho Ino Nasionál iha isar bandeira ne’e. Depois sei iha prémiu seluk ne’ebé prémiu di´ak tebes maibé ne’e segredu hela. Prémiu ida terseiru, sé mak manan, nia lian ne’e sei ba halo gravasaun ba múzika 10 ne’e hodi halo ba CD (Compact Disc) no sira nia lian ne’e hela ba istória no múzika sira ne’e hanesan múzika nasionál,” Prezidente Juri, Aderito da Costa, informa.

Sé mak manan, nia eplika, tenke priense kriteria avaliasaun haat (4) ne’ebé ekipa juri prepara. Primeiru, harmonizasaun, katak koru sira tenke kanta tuir aranju ne’ebé hakerek ona ka notasaun sira ne’ebé iha. Intuasaun, katak kada voz ne’e iha ninia lian rasik no labele salta tun-salta sa’e, entaun lian haat (Bass, Alto, Tenor, Sopran) tenke kanta ninian ho tonaliade tenke hanesan.

Dinamikas, signifika katak espresaun balun ne’ebé mezoforte, piano, mezopiano, crescendo ka de crescendo, maibé ami mos fó liberdade ba sira atu halo espresaun. Artikulasaun, katak tenke kanta ho lian, liafuan tetun tenke moos tuir notasaun ne’ebé iha. Ikus liu mak uniforma.

“Valór aas liu mak iha harmonizasaun ne’e 30%. Intuasaun 20%. Dinamika 20%. Artikulasaun 20% no uniforma 10%,” nia esplika.

Iha biban hanesan, nia hateten, daudaun ne’e iha múzika 10 tanba múzika 10 ne’e aplika atu kanta. Múzika ho titulu “Oras To’o Ona” ne’e múzika obrigatóriu tanba ita selebra loron Konsulta populár ba dala-20 nian.

“Múzika sira ne’ebé halo selesaun mak Lemorai, Oh Rai Timor, Rai Timor Lorosa’e, Por Ti Timor,  Xanana, Tansa La Dame, Buka Riku Soin, no núzika seluk tan. Iha selesaun múzika iha múzika 80 no múzika sira ne’e halo ba livru para bele fahe ba eskola sira,” nia hateten.

Nia informa, grupu korál múzika rezistensia ne’ebé kompete iha sábadu (3/8/2019) mak Grupu A ne’ebé kompostu husi Domin Ba Nai husi Tuana Laran, Movimentu Juventude Korál Sta. Cecilia no Grupu Nossa Senhora de Lourdes.

Grupu sira ne’ebé tama iha Grupu B sei kompete iha domingu (4/8/2019) ne’ebé kompostu husi grupu Santa Bhakita Becora, Nossa Senhora da Grasa, Mate Restu, Ensinu Superiór Siénsia no Kultura no grupu St. Inacio de Loyola.

Grupu korál seluk ne’ebé tama iha Grupu C sei kompete iha segunda (5/8/2019) kompostu husi grupu Nossa Senhora do Carmo Catedral, UNE-TL Aileu, Santa Filomena, Nossa Senhora do Carmo Lahane Osidentál.

Notísia relevante: http://www.tatoli.tl/2019/08/04/kompetisaun-grupu-koral-muzika-rezistensia-dignifika-artista-no-kompozitor-muzika-sira/?fbclid=IwAR3_hrEyxIVJ5t6RPB478ngf_tXxLewwRL3T2ZLb8_YzCKe0j4LLPK3-ay4

http://www.tatoli.tl/2019/08/03/cnc-sei-fornese-muzika-rezistensia-10-ba-eskola-sira/

Jornalista: Cancio Ximenes

Editór      : Rafy Belo

HAKEREK NO HATÁN

Please enter your comment!
Please enter your name here