Grupu korál sira ne´ebé sei tuir audisaun. Foto: CNC

DILI, 03 agustus 2019 (TATOLI)-Centro Nacional Chega (CNC) kompromete sei hakerek livru kona-ba múzika rezisténsia 10 kompletu ho notas inklui istória badak, ne’ebé kompozitór timoroan na´in tolu halo ona aransamentu depois sei prodús hodi fornese ba eskola hotu iha Timór laran tomak.

Múzika 10 ne’e hetan prioridade dahuluk husi kompozitór timoroan na´in tolu depois halo selesaun ba múzika rezisténsia 50 ne’ebé durante ne’e CNC halo kolesaun.

Diretór Ezekutivu Centro Nacional Chega, IP, Hugo Maria Fernandes. Imajen Tatoli/Egas Cristóvão

Kordenadór Programa no Komisaun Organizadora tinan 20 Konsulta Populár, Hugo M. Fernandes hateten, múzika rezisténsia 10 ne’ebé CNC planu sei prodús iha tinan ida ne’e depois sei fahe ba eskola sira, ho hanoin ida atu ajuda jerasaun foun sira la´ós hatene kanta de’it maibé oinsa atu hatene mós istória kona-ba múzika sira ne’e rasik.

“Tinan ida ne’e ita tau hamutuk múzika rezisténsia 10 ne’e depois sei hakerek ba livru hodi fahe ba estudante sira iha eskola hotu atu bele ajuda sira-nia koñesementu kona-ba istória husi múzika sira ne’e rasik,” informa Koordenadór Hugo Fernandes ba Ajénsia TATOLI hafoin akompaña audisaun eliminasaun grupu korál sira iha Sentru Konvensaun Dili (CCD-sigla portugés), sábadu (03/08/2019).

Nia hatutan, CNC prontu ona atu ajuda jerasaun foun sira. Tan ne’e kuandu múzika sira ne’e produs hotu ona, CNC sei husu apoiu ba Ministériu Edukasaun halo distribuisaun livru sira ne’e ba eskola sira hotu.

Tuir nia, CNC ho ME iha ona kooperasaun di´ak entaun posivelmente livru sira ne’e sei bele prodús ho di´ak no lalais liután. Tanba governu mak iha meius hotu atu halo ida ne’e.

Prezidente CNC, Hugo Fernandes haktuir, múzika 10 ne’e mak agora dadaun tama iha audisaun ne’ebé grupu koral sira hahú ona halo aprezentasaun  hodi komemora tina 20 Konsulta Populár no mós prezensa INTERFET iha Timor-Leste.

Portantu, múzika rezisténsia 10 ne’ebé kompozitór na´in tolu deside hodi kompleta ninia aransamentu ne’e mak ” Oras To’o Ona, Rai Timor Loro Sa’e, Tanba Riku Soin, Oh Rai Timor, Nonoi Furak, Tahu Tempe, Por Ti Timor, Tansa La Dame, Lemorai, Liu Tinan Atus Haat”.

Múzika sira ne’e fahe ona ba grupu korál sira hodi halo preparasaun no faze dahuluk aprejentasaun hahú ona iha loron 3 agustu 2019 iha CCD.

Alende prodús livru kona-ba múzika rezisténsia 10 ne’e, Kordenadór Programa no Komisaun Organizadora tinan 20 Konsulta Populár, Hugo M. Fernandes informa katak iha kompetisaun faze finál ne’e ramata, CNC sei fó oportunidade ba grupu korál ne’ebe sai vensedór, sei halo fali gravasaun depois iha festa 30 agustu iha Tasi Tolu, grupu korál ne’e rasik mak sei hananu inu nasionál (Pátria, Pátria) inklu múzika rezisténsia rua husi múzika rezisténsia 10 ne’ebé kompozitór sira hakerek ona.

Entertantu, kompozitór timoroan na’in tolu ne’e mak hanesan Paul Pereira dos Santos, Mito Freitas no Pe. Aderito Victor.  Kompozitor sira ne’e iha koñesementu kle´an oinsa atu halo aransamentu ba kualker múzika ida ho lian Soprano, Alto Tenor no Bass tanba sira ne’e kompletu ona eskola iha akademia múzika.

Jornalista:Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here