Arguido sira ba Masakre Kuluhun, Dili, ovin, tuer audensia julgamentu iha TDD. Imajen/Domingos Piedade Freitas

DILI, 23 jullu 2019 (TATOLI) – Tribunal Distritál Dili (TDD), ohin, kontinua hala’o prosesu julgamentu ba kazu trajédia Kulu-hun, Dili, ne’ebé involve direita husi membru Polísia na’in rua (2) hodi Pistola tiru mate joven na’in tolu (3) no  na’in lima (5) seluk hetan kanek.

Notísia Relevante : Governu Hato’o Sentidu Kondolénsias Família Matebian Iha Kuluhun

PN Apresia Família Vítima Kuluhun Koopera Ho Estadu

Perante julgamentu,  defeza JPA hato’o kestaun ba tribunal atu halo alterasaun deklarasaun, tanba antes iha primeiru julgamentu arguido JPA hili dalan nonook mak husu fila fali ba tribunal atu fó tempu ba arguido hili nia direitu atu hakarak deklara nia razaun.

Tribunal mós aseita, atu arguido JPA konfesa ba tribunal kona-ba faktu sira ne’ebé konta iha autos ba krime omisídiu agravadu no omisídiu tentada.

Iha arguido JPA nia deklarasaun, hatete katak loos duni iha momentu ne’ebá, ho pistola tiru duni, maibé la’ós tiru direita ba vítima sira, arguido simente lolo pistola ba leten hodi tiru sa’e dala tolu (3).

arguida JPA  klarifika, katak iha momentu kalan akontesimentu nee haree arguido ida seluk ho inisiál FMS mak tiru. No momentu nee hatete nia uza kartús musan lima mak lori tiru vítima sira.

“Momentu nee ha’u tiru duni, maibé tiru sa’e ba leten, la’ós tiru direita ba vítima sira, so kolega FMS mak tiru uza kartús musan lima,” arguido JPA hateten iha nia deklarasaun.

Arguido JPA hatete, iha momentu nee iha nia pistola laran iha kartús musan 10, kartús tolu (3) mak lori tiru no kartús hitu (7) seluk entrega bá komandu jerál PNTL.

Nia konta, katak antes akontese problema, iha joven balu mak diskute malu, entaun iha momentu ne’ebá arguido FMS mak hakilar haruka hapara situasaun. Maibé momentu nee, ema ida mós la rona, tanba nee mak arguido FMS foti kadeira hamriik iha leten mak tiru sa’e, no arguido JPA hamriik hosi arguido FMS nia kotuk.

Derrepente joven balu lori kadeira baku arguido JPA nia kotuk, nune’e halo arguido nervozu mak tiru, maibé la hatene pistola musan atu kona vítima sira, tanba tuir nia hanoin momentu nee pistola tiru sa’e ba leten.

Depois tiru remata, hare joven na’in tolu (3) monu latan ba rai, lahatene katak, sira mate ka lae, tanba depois tiru hotu arguido hatama pistola halai kedas ba komandu jerál hodi relata informasaun katak sira tiru ema.

“Momentu nee ha’u lahatene, katak sesé mak mate no sesé mak kanek, ha’u so haree alin na’in tolu monu latan ba rai, entaun momentu nee kedas, ha’u halai ba komandu atu relata informasaun katak ami tiru ema”, arguido konfesa iha audiénsia julgamentu.

Iha parte seluk, vítima Paulino de Jesus, ne’ebé hetan mós tiru, deklara ba tribunal katak, iha loron 17 fulan Novembru 2017, iha oras tuku 12:00 kalan, iha aldeia 03, Suku Kulu-hun mosu diskusaun entre joven na’in rua iha tenda laran.

Iha momentu tanba ema hakilar malu makas rona duni, arguido FMS hatete dehan “kalma, kalma”, maibé joven sira la rona nafatin. Tanba nee halo arguido sira hirus hodi tiru ema arbiru iha tenda laran.

Nia dehan, momentu nia rasik haree ho matan katak, arguido JPA mak uza duni pistola tiru vítima na’in tolu mate iha fatin, balu hetan kanek, tanba arguido tiru rajada de’it.

“Ha’u hare maun FMS mak tiru duni, halo kolega na’in tolu latan kedas, tanba nia tiru rajada mak hodi kona hotu ha’u nia kabas,” vítima deklara.

Vítima Paulino de Jesus, informa festa  kore metan refere arguido FMS   nia alin mane nia kore metan (aman maun alin), tanba nee, membru polísia refere,  konvida nia kolega polísia balun hosi Unidade UPM  inklui olísia JPA hodi mai asiste festa refere.

Tanba nee, bainhira festa hahú, iha festa klaran, mosu diskute malu, entre joven sira, tanba nee membru polísia na’in rua ne’e halo intervensaun hodi tiru inklui kontinua tiru diretamente ba família sira ne’ebé asiste hela festa kore metan nee hodi halai namkari hotu.

Rona tiha deklarasaun nee, tribunal adia fali julgamentu ba loron 31 fulan nee no loron 01 de Agostu, iha oras tuku 9:00 dadeer, hodi kontinua rona vítima na’in 4 seluk.

Audiénsia ba prosesu nee prezide husi Juiza Edite Palmira, Srybuana da Costa no akompaña mós hosi Juis estajiáriu na’in ida. Parte Ministériu públiku reprezenta prokuradór Jacinto Babo, no arguido sira hetan asisténsia lega hosi defensór públiku, Estáquio Guterres no advogadu privadu Pedro Apariçio Guterres.

Notiísia Relevante : MP Konklui Ona Akuzasaun Kazu Kulu-hun

Xefe Estadu Hato’o Kondolénsia Ba Família Matebian Kazu Kulu-Hun

Jornalista          : Domingos Piedade Freitas

Editór                : Francisco Simões

HAKEREK NO HATÁN

Please enter your comment!
Please enter your name here